రాజీనామా చేసిన వాలంటీర్లకు జీతాలు చెల్లింపు

రాజాం, న్యూస్‌టుడే: ఎన్నికల నేపథ్యంలో వాలంటీర్లు పెద్ద ఎత్తున రాజీనామా చేస్తూ వస్తున్నారు. ఇలా ఉద్యోగాలు వదులుకున్న వారికి గౌరవవేతనం చెల్లించకూడదు. రాజాం మున్సిపాల్టీ పరిధిలో రాజీనామా చేసిన 16 మంది వాలంటీర్లకు గౌరవవేతనాలు మేనెలలో జమ చేయడం తీవ్ర చర్చనీయాంశమైంది. పట్టణ పరిధిలో 11 సచివాలయాల్లో 210 మంది వార్డు వాలంటీర్లు ఉండగా వీరిలో 190 మంది రాజీనామా చేసినట్లు గుర్తించారు. ఇందులో 16 మందికి సంబంధించి ఒకొక్కరికి రూ.5 వేలు చొప్పున జమ కావడంతో అధికారులు కంగుతిన్నారు. వీరికి జీతాలు ఎలా జమయ్యాయనే అంశంపై ఆరా తీయగా.. జీతాలు బిల్లు పెట్టిన తరువాత వీరు రాజీనామా చేసినట్లు తేలింది. మున్సిపాల్టీలో ప్రతి నెలా 20వ తేదీకి జీతాల బిల్లులు సమర్పిస్తారు. ఈ తేదీ తరువాత రాజీనామా చేసిన వాలంటీర్లకు గౌరవ వేతనాలు మంజూరయ్యాయి. వీరి నుంచి రికవరీ చేస్తున్నట్లు మున్సిపల్‌ కమిషనర్‌ జాగరపు రామ అప్పలనాయుడు ‘న్యూస్‌టుడే’కు తెలిపారు.