పనితీరు మారకుంటే చర్యలు తప్పవు : సీఎండీ

మాట్లాడుతున్న ఏపీఎస్పీడీసీఎల్‌ సీఎండీ సంతోషరావు, వేదికపై

సీజీఎం ధర్మజ్ఞాని, ఓఎస్‌డీ శ్రీనివాసులు, ఎస్‌ఈ మునిశంకరయ్య

కడప గ్రామీణ, న్యూస్‌టుడే : విద్యుత్తు యంత్రాంగం తమ పనితీరును మార్చుకోవాలని, లేదంటే చర్యలు తప్పవని ఏపీ ఎస్పీడీసీఎల్‌ సీఎండీ సంతోషరావు హెచ్చరించారు. జిల్లాకు వచ్చిన ఆయన గురువారం జడ్పీ కార్యాలయ సమావేశ మందిరంలో ఏర్పాటు చేసిన సమావేశంలో పాల్గొని మాట్లాడారు. పలుచోట్ల నుంచి ఫిర్యాదులు వస్తున్నాయని, ఇదివరకే అనేక అవకాశాలు ఇచ్చామని, ఇప్పటికైనా మార్పు రావాల్సిన అవసరం ఉందన్నారు. వినియోగదారుల సేవల కోసమే మనందరం ఉన్నామన్న విషయం గుర్తుంచుకుని జాగ్రత్తగా పనిచేయాలని సూచించారు. ప్రమాణాల ప్రకారం సేవలు సకాలంలో పూర్తి చేయలేని పక్షంలో సంబంధిత అధికారులు వినియోగదారులకు పరిహారం చెల్లించాల్సి వస్తుందన్నారు. వాలిన స్తంభాలను, లూజు తీగలను సరిచేయాలని ఆదేశించారు. విద్యుత్తు నియంత్రికల వైఫల్యాలను నియంత్రించాలన్నారు. సంస్థ ఆర్థిక స్థితిగతులను మెరుగుపరిచేందుకు బకాయిలు వసూలు చేయాలని ఆదేశించారు. రైతులకు పగటి పూటే విద్యుత్తు ఇవ్వాలని స్పష్టం చేశారు. జగనన్న కాలనీల్లో విద్యుత్తు మీటర్లు ఏర్పాటు చేయాలన్నారు. అనంతరం విద్యుత్తు ఉద్యోగుల సామాజిక సేవాసంఘం దశమ వార్షికోత్సం సందర్భంగా కాలమానిని ఆవిష్కరించారు. అంతకు ముందు అనాథాశ్రమంలో వృద్ధులకు దుస్తులు పంపిణీ చేశారు. సమావేశంలో సీజీఎం ధర్మజ్ఞాని, ఓఎస్‌డీ శ్రీనివాసులు, ఎస్‌ఈ మునిశంకరయ్య, వైఎస్‌ఆర్‌, అన్నమయ్య జిల్లాల సీనియర్‌ అకౌంట్‌ అధికారులు, ఈఈలు, డీఈలు, ఏఈలు,  విద్యుత్తు ఉద్యోగుల సామాజిక సేవాసంఘం సంఘ అధ్యక్షుడు నాగరాజు, ప్రధానకార్యదర్శి చలపతి, వర్కింగ్‌ ప్రెసిడెంట్‌ ఫయాజ్‌, కోశాధికారి రఘు తదితరులు పాల్గొన్నారు.