నేరాలకు పాల్పడితే కఠిన చర్యలు

పులివెందులలో మట్కా బీటర్లకు కౌన్సెలింగ్‌ నిర్వహిస్తున్న డీఎసీˆ్ప వినోద్‌కుమార్‌, పోలీసులు

ఈనాడు డిజిటల్‌, కడప, న్యూస్‌టుడే, పులివెందుల: పులివెందుల పోలీసులు ఆలస్యంగానైనా స్పందించారు. అసాంఘిక కార్యకలాపాలకు పాల్పడే వారిపై కఠిన చర్యలు తీసుకుంటామని హెచ్చరించారు. మట్కా బీటర్లను శనివారం పోలీసుస్టేషన్‌కు పిలిపించి కౌన్సెలింగ్‌ ఇచ్చారు. ఇకపై జూదం, క్రికెట్ బెట్టింగ్‌ తదితర అసాంఘిక కార్యకలాపాలకు పాల్పిడితే కఠిన చర్యలతో పాటు పట్టణ బహిష్కరణ ఉంటుందని స్పష్టం చేశారు. ‘ఈనాడు’లో శనివారం ‘మట్కా.. అడ్డుకట్ట పడక’ శీర్షికన ప్రచురితమైన కథనంపై స్పందించిన డీఎస్పీ వినోద్‌కుమార్‌ పట్టణంలో అసాంఘిక కార్యకలాపాలకు పాల్పడుతున్న వ్యక్తులను పిలిపించి గట్టిగా హెచ్చరించారు. ఇక నుంచి పూర్తిస్థాయిలో నిఘా ఉంటుందని, శాంతిభద్రతలకు సహకరించాలని ఆదేశించారు. డీఎస్పీ వెంట సీఐ రాజు, ఎస్‌.ఐ.హుస్సేన్‌ తదితరులున్నారు.