షర్మిలకు మద్దతుగా పులివెందులలో సునీత ప్రచారం

షర్మిలకు ఓటేయాలని విన్నవిస్తున్న సునీత

ఈనాడు-కడప, న్యూస్‌టుడే-పులివెందుల: కడప పార్లమెంట్‌ కాంగ్రెస్‌ అభ్యర్థి వైఎస్‌ షర్మిల తరఫున మాజీ మంత్రి వివేకానందరెడ్డి కుమార్తె సునీత దంపతులు గురువారం నుంచి ఇంటింటి ప్రచారం ప్రారంభించారు. పులివెందులలోని పూలంగళ్ల సర్కిల్‌లోని వినాయకస్వామి ఆలయంలో పూజలు చేసిన అనంతరం పీసీసీ మీడియా సెల్‌ కన్వీనర్‌ తులసిరెడ్డితో కలిసి ప్రచారం చేపట్టారు. కడప ఎంపీగా పోటీ చేస్తున్న షర్మిలకు ఓటేయాలని విన్నవించారు. సునీత తమ ఇంట్లోకి వచ్చేసరికి పలువురు కన్నీటి పర్యంతమయ్యారు. వివేకాతో తమకున్న అనుబంధాన్ని గుర్తు చేసుకున్నారు. తన తండ్రిని హత్య చేసి అయిదేళ్లయినా న్యాయం జరగలేదని, చంపినవాళ్లను ప్రజాకోర్టులోనైనా శిక్షించాలని సునీత ఓటర్లను కోరారు. పులివెందుల నియోజకవర్గ ప్రజలకు వివేకానందరెడ్డి 40 ఏళ్లు సేవలు అందించారని తెలిపారు. హత్య చేయడమే కాకుండా ఆయన వ్యక్తిత్వాన్ని దెబ్బతీసేలా రాతలు రాస్తున్నారంటూ వివరించారు. ఆయన్ని అవమానించేలా ఫొటోలు, వీడియోలతో దుష్ప్రచారం చేస్తున్నారని విచారం వ్యక్తం చేశారు. జరిగిన అన్యాయంపై తాము మాట్లాడలేని పరిస్థితిలో ఉన్నామని, తప్పకుండా షర్మిలకు మద్దతు తెలుపుతామంటూ వారు సునీతకు భరోసా ఇచ్చారు.