EYE Sight: కంటి చూపును కాపాడుకోండిలా!

ఇంటర్నెట్‌ డెస్క్‌: ‘సర్వేంద్రియానం నయనం ప్రధానం’ అన్నారు పెద్దలు. అందుకే కంటి గురించి ప్రత్యేక శ్రద్ధ వహించాల్సిన అవసరం ఎంతైనా ఉంది. ప్రస్తుతం ఉన్న వాతావరణ పరిస్థితులు, కాలుష్యం, ఆహారపు అలవాట్లు, జీవనవిధానం వల్ల కంటికి అనేక చిక్కులు వస్తున్నాయి. ఈ నాలుగు చిట్కాలు పాటిస్తే మీ కంటి చూపును కాపాడుకున్న వారవుతారు. అవేంటో చూద్దాం రండి!

సమతుల్యమైన ఆహారం: తీసుకొనే ఆహారంలో ఎక్కువగా యాంటీ ఆక్సిడెంట్లు, విటమిన్‌ ఎ, సి ఉండేటట్లు చూసుకోవాలి. ఆకుకూరలు, కూరగాయలు తీసుకోవాలి. ఒమేగా-3 ఉండే చేపలను తీసుకోవాలి. ఇవి కంటి చూపు మెరుగు పడేందుకు దోహదపడతాయి.

మంచి నిద్ర: ప్రశాంతంగా నిద్రపోవడం ద్వారా కళ్లకు కావాల్సిన విశ్రాంతి లభిస్తుంది. కళ్లకు మాత్రమే కాదు మంచిగా నిద్ర పోతే రోగ నిరోధక శక్తి కూడా మెరుగు పడుతుంది. అందుకే హాయిగా పడుకోండి!

సన్‌ గ్లాసెస్‌ తప్పనిసరి: ఇంటి నుంచి బయటకు వెళ్లిన ప్రతిసారీ కూలింగ్‌ గ్లాసెస్‌ తప్పనిసరిగా ధరించాలి. ఇవి సూర్యుడి నుంచి వచ్చే అతినీలలోహిత కిరణాల నుంచి కళ్లకు రక్షణనిస్తాయి.

పదే పదే కళ్లను చేతితో తాకకండి: రోజు మనం ఎన్నో పనులు చేస్తుంటాం. ఎన్నింటినో తాకుతుంటాం. అదే చేతితో కళ్లను తాకకూడదు. అలా చేస్తే బాక్టీరియా కళ్లలోకి చేరే అవకాశాలు ఎక్కువగా ఉన్నాయి. ఈ చిన్న చిన్న చిట్కాలను పాటిస్తూ కళ్లను ఆరోగ్యంగా ఉంచుకోండి.