కాత్యాయని అలంకారంలో శ్రీశైల భ్రమరాంబ

శ్రీశైలం ఆలయం: అష్టాదశ శక్తిపీఠమైన శ్రీశైల మహాక్షేత్రంలో దసరా మహోత్సవాలు వైభవంగా జరుగుతున్నాయి. ఉత్సవాల్లో భాగంగా ఆరో రోజైన గురువారం భ్రమరాంబ దేవి కాత్యాయని అలంకారంలో భక్తులకు దర్శనమిచ్చారు. కాత్యాయని అమ్మవారికి అర్చకులు వేదమంత్రోచ్ఛరణలతో పూజలు నిర్వహించారు. అక్క మహాదేవి అలంకరణ మండపంలో మల్లికార్జున స్వామి-అమ్మవార్ల ఉత్సవమూర్తులను హంస వాహనంపై అధిష్టింపజేశారు. అనంతరం ఉభయ దేవాలయాల అర్చకులు, వేదపండితులు పుష్పార్చనలు చేసి మంగళ హారతులు సమర్పించారు. మంగళ వాయిద్యాల నడుమ స్వామి-అమ్మవార్ల ఉత్సవం వైభవంగా జరిగింది.