ఎట్టకేలకు చిరుత చిక్కింది

 హైదరాబాద్‌ :  రాజేంద్రనగర్‌, శంషాబాద్‌లో పరిసర ప్రాంతాల్లో  ప్రజలను తీవ్ర భయాందోళనకు గురి చేసిన చిరుత ఎట్టకేలకు బోనులో చిక్కింది. గత కొన్ని నెలలుగా ఇక్కడే సంచరిస్తూ దాడులకు పాల్పడుతోంది. నిన్న రాజేంద్రనగర్‌లోని వాలంతరి ఆవరణలో ఓ పశువుల పాకలో ఆవు దూడలపై దాడి చేసి రెండు దూడలను చంపేసింది.  తెల్లవారుజామున పాక వద్దకు వచ్చిన యజమాని బాబా చనిపోయిన దూడలను గుర్తించి అటవీశాఖ అధికారులకు సమాచారం ఇచ్చారు. స్పందించిన పోలీసులు, అటవీశాఖ అధికారులు పరిశీలించి బోన్లు, సీసీ కెమెరాలు ఏర్పాటు చేశారు. చనిపోయిన దూడలను ఎరగా అక్కడే ఉంచారు.

ఈ క్రమంలో ఆదివారం అర్ధరాత్రి మళ్లీ పశువుల పాక వద్దకు వచ్చిన చిరుత అటవీ అధికారులు ఏర్పాటు చేసిన బోనులో చిక్కింది. దీంతో స్థానిక ప్రజలు ఊపిరి పీల్చుకున్నారు. చిరుతను అటవీశాఖ అధికారులు జూపార్కుకు తరలించారు.