Raghurama: ఎంపీ రఘురామ ఇంటికి ఏపీ సీఐడీ పోలీసులు

హైదరాబాద్‌: వైకాపా ఎంపీ రఘురామకృష్ణరాజు ఇంటికి ఏపీ సీఐడీ పోలీసులు చేరుకున్నారు. నోటీసులు ఇచ్చేందుకు హైదరాబాద్‌ గచ్చిబౌలిలోని ఎంపీ నివాసానికి వచ్చారు. 17న విచారణకు హాజరుకావాలని పోలీసులు ఆయనకు నోటీసులు ఇచ్చారు. తొలుత ఆ నోటీసులు తనకు అందించాలని రఘురామ కుమారుడు పోలీసులను కోరగా వారు నిరాకరించారు. నేరుగా రఘురామకే అందజేస్తామని స్పష్టం చేశారు. అనంతరం ఆయనకే అందజేసి వెళ్లారు. అయితే రఘురామకు అందించిన నోటీసులు ఏ కేసుకు సంబంధించినవి అనేది తెలియాల్సి ఉంది.

తన సొంత నియోజకవర్గం నరసాపురం పర్యటనకు రేపు వెళ్తున్నట్లు ఇప్పటికే రఘురామ ప్రకటించారు. రెండు రోజులపాటు నియోజకవర్గంలో ఉంటానని చెప్పారు. ఈ నేపథ్యంలో ఆయనకు సీఐడీ పోలీసులు నోటీసులు ఇచ్చేందుకు వెళ్లడం ప్రాధాన్యం సంతరించుకుంది.