Telangana News: మరో 86 గురుకుల పాఠశాలలకు జూనియర్‌ కళాశాలల స్థాయి

హైదరాబాద్‌: రాష్ట్రంలోని అన్ని జిల్లాల్లో ఎస్సీ, ఎస్టీ, బీసీ, మైనార్టీల కోసం శాశ్వత ప్రాతిపదికన స్టడీ సర్కిళ్లు ఉండాలన్న ముఖ్యమంత్రి కేసీఆర్ ఆదేశాలకు అనుగుణంగా నివేదిక సిద్ధం చేయాలని ప్రభుత్వ ప్రధాన కార్యదర్శి (సీఎస్‌) సోమేశ్ కుమార్ అధికారులను ఆదేశించారు. గురుకులాల సంబంధిత అధికారులతో శుక్రవారం సమావేశమైన ఆయన.. గురుకుల పాఠశాలల పనితీరుపై సమీక్షించారు. రాష్ట్రంలో మరో 86 గురుకుల పాఠశాలలను జూనియర్ కళాశాలలుగా స్థాయి పెంచాలని సీఎం కేసీఆర్ ఆదేశించినట్లు తెలిపారు. అందులో 75 ఎస్సీ, 7 ఎస్టీ, 4 బీసీ పాఠశాలలున్నాయి. ఇందుకు సంబంధించి ముఖ్యమంత్రి ఆదేశాలకు అనుగుణంగా తగిన చర్యలు తీసుకోవాలని సీఎస్ అధికారులకు స్పష్టం చేశారు. అన్ని గురుకులాల్లో పరిశుభ్రత కోసం స్పష్టమైన మార్గదర్శకాలు రూపొందించేందుకు, వంట సిబ్బందికి తగిన శిక్షణ ఇచ్చేలా చర్యలు తీసుకోవాలని చెప్పారు.