జనవరి 3 నుంచి యథావిధిగా పెట్రోల్‌ సరఫరా.. ఆందోళన వద్దు: పెట్రోల్‌ పంపుల అసోసియేషన్‌

హైదరాబాద్‌: జనవరి 3వ తేదీ నుంచి పెట్రోల్‌ సరఫరా యథావిధిగా కొనసాగుతుందని, వినియోగదారులు ఎలాంటి ఆందోళన చెందొద్దని తెలంగాణ పెట్రోల్‌ పంపుల అసోసియేషన్‌ అధ్యక్షుడు అమరేందర్‌రెడ్డి తెలిపారు. ట్రక్‌ డ్రైవర్లు ఎలాంటి ముందస్తు సమాచారం ఇవ్వకుండా సమ్మె చేయడం వల్ల ఇబ్బంది ఏర్పడిందన్నారు. డ్రైవర్స్‌తో మాట్లాడి వారి అనుమానాలను నివృత్తి చేశామని చెప్పారు. ఎక్కడా పెట్రోల్‌, డీజిల్‌ కొరత లేదన్నారు. సామాజిక మాధ్యమాల్లో వచ్చే వార్తలను నమ్మొద్దన్నారు. కొందరు కృత్రిమంగా పెట్రోల్‌ కొరత సృష్టించే ప్రయత్నం చేస్తున్నారని.. అలాంటి వారిపై చర్యలు తీసుకుంటామని అమరేందర్‌ రెడ్డి వెల్లడించారు.