ఒకరు కాదు ఇద్దరు కాదు.. ఎనిమిది మంది భార్యలు.. ఒకే ఇంట్లో కాపురం

అతడో సామాన్యుడు. ఎనిమిది మందిని పెళ్లి చేసుకున్నాడు. అంతకుముందు చేసుకున్న భార్యలను ఒప్పించి మరీ వివాహమాడాడు. ఆ ఎనిమిది పెళ్లిళ్లు కూడా ప్రేమ తంతులే. ఒక్కో గదిలో ఇద్దరు భార్యల చొప్పున.. ఎనిమిది మందితో కాపురం చేస్తున్న అతడే థాయ్‌లాండ్‌కు చెందిన ఓంగ్‌ డామ్‌ సోరోట్‌. థాయ్‌లాండ్‌లో ఫేమస్‌ అయిన టాటూ ఆర్టిస్ట్‌ ఓంగ్‌ సోరోట్, అతడి భార్యలను ఓ థాయ్‌ కమెడియన్‌ ఇంటర్వ్యూ చేశాడు. అందులో తన ప్రేమలు, పెళ్లిళ్లపై ఆసక్తికర విషయాలను వెల్లడించాడు ఓంగ్‌. తమది ఎంతో అన్యోన్య దాంపత్యమని చెప్పుకొచ్చాడు. తన భార్యలు తనపై ఎంతో ప్రేమను కనబరుస్తారని అంటున్నాడు. మొదటి భార్యను స్నేహితుడి పెళ్లిలో, రెండో భార్యను మార్కెట్‌లో, మూడో భార్యను హాస్పిటల్‌లో.. నాలుగు, అయిదు, ఆరో భార్యలను ఇన్‌స్టాగ్రామ్, ఫేస్‌బుక్, టిక్‌టాక్‌లలో, ఏడో భార్యను ఆలయంలో చూసి మనసు పారేసుకొని వారిని ఒప్పించి మనువాడాడు. ఓసారి నలుగురు భార్యలతో కలిసి విహారయాత్రకు వెళ్లినప్పుడు.. తన ఎనిమిదో భార్యను చూసి ఇష్టపడి అక్కడే పెళ్లిచేసుకొని.. ఇంటికి తీసుకొచ్చాడు. ఓంగ్‌ ఇంట్లో నాలుగు పడక గదులు ఉన్నాయి. ఒక్కో గదిలో ఇద్దరు భార్యల చొప్పున కాపురం చేస్తున్నాడు.