IIT madras: ఐఐటీ మద్రాస్‌లో ఏపీ విద్యార్థి ఆత్మహత్య.. నెల రోజుల్లో రెండో ఘటన!

చెన్నై: తమిళనాడు(tamilnadu)లోని ప్రతిష్టాత్మక మద్రాస్‌ ఐఐటీ(IIT madras)లో మరో విద్యార్థి ఆత్మహత్యకు పాల్పడటం కలకలం రేపింది. ఏపీకి చెందిన పుష్పక్‌ శ్రీ సాయి (20) అనే విద్యార్థి హాస్టల్‌ గదిలో ఉరివేసుకొని బలవన్మరణం చెందినట్టు పోలీసులు వెల్లడించారు. నెల రోజుల వ్యవధిలో ఈ విద్యా సంస్థలో ఇద్దరు విద్యార్థులు ఆత్మహత్యకు పాల్పడటం కలకలకం రేపుతోంది. ఎలక్ట్రికల్‌ ఇంజినీరింగ్‌ విభాగంలో బీటెక్‌ మూడో సంవత్సరం చదువుతున్నసాయి తన గదిలోనే ఉరివేసుకొని కనిపించినట్టు పోలీసులు తెలిపారు. అకాడమిక్‌ సంబంధిత సమస్యల వల్లే అతడు ఈ తీవ్ర నిర్ణయం తీసుకోవడానికి కారణమై ఉండొచ్చని ప్రాథమికంగా అభిప్రాయపడుతున్నట్టు ఈ కేసును దర్యాప్తు చేస్తున్న అధికారి ఒకరు తెలిపారు. అయితే, విద్యార్థి స్వస్థలం ఏపీలో ఎక్కడ అనే సమాచారం తెలియరాలేదు. తోటి విద్యార్థులు ఇచ్చిన సమాచారంతో ఘటనా స్థలానికి చేరుకున్న పోలీసులు ఈ ఘటనపై పూర్తి విచారణ జరిపి, పోస్టుమార్టం తర్వాతే మిగతా వివరాలు చెప్పగలమని చెప్పారు.  ఫిబ్రవరి 14న ఐఐటీ మద్రాస్‌లో ఇంజినీరింగ్ పీజీ విద్యార్థి హాస్టల్‌ గదిలోనే ఉరివేసుకొని బలవన్మరణం చెందిన విషయం తెలిసిందే. 

ఈ ఘటనపై ఐఐటీ మద్రాస్‌ స్పందించింది. ఎలక్ట్రికల్ ఇంజినీరింగ్ విభాగానికి చెందిన మూడో సంవత్సరం బీటెక్‌ విద్యార్థి అకాల మరణం తీవ్ర ఆవేదన కలిగించిందని పేర్కొంది. కరోనా తర్వాత వాతావరణం సవాల్‌తో కూడుకున్నదిగా మారిందని, తమ క్యాంపస్‌లో విద్యార్థులు/ అధ్యాపకులు, సిబ్బంది శ్రేయస్సును దృష్టిలో ఉంచుకొని మెరుగైన పరిస్థితులు కల్పించేందుకు కృషిచేస్తున్నట్టు తెలిపింది. ఎన్నికైన విద్యార్థి ప్రతినిధులతో పాటు విద్యాసంస్థ అంతర్గత కమిటీ ఇలాంటి వ్యవహారాలను పరిశీలిస్తుందని పేర్కొంది. విద్యార్థి తల్లిదండ్రులకు ఇప్పటికే సమాచారం ఇచ్చినట్టు వెల్లడించింది. ఈ దుఃఖ సమయంలో తమ సంస్థ తరఫున ఆ కుటుంబానికి ప్రగాఢ సానుభూతి తెలుపుతున్నట్టు తెలిపింది.