Hyderabad: నాలాల వద్ద అక్రమ నిర్మాణాలపై త్వరలో నిర్ణయం: మంత్రి తలసాని

హైదరాబాద్‌: భారీ వర్షాల నేపథ్యంలో హైదరాబాద్‌లో వారం పాటు అన్నిశాఖల అధికారులు అప్రమత్తంగా ఉండాలని మంత్రి తలసాని శ్రీనివాస్‌ యాదవ్‌ ఆదేశించారు. హుస్సేన్‌సాగర్‌ పరిసర ప్రాంతాలను మంత్రి ఇవాళ పరిశీలించారు. హుస్సేన్‌ సాగర్‌ నుంచి 2 వేల క్యూసెక్కుల నీటిని దిగువకు విడుదల చేస్తున్నట్లు చెప్పారు. నాలాల వద్ద అక్రమ నిర్మాణాలతో ఇబ్బందులున్నాయని.. వాటిపై త్వరలో ఒక నిర్ణయం తీసుకుంటామని వెల్లడించారు. అవసరమైతే నష్టపరిహారం కూడా ఇస్తామని తెలిపారు.

నగరంలో నాలాలు అభివృద్ధి చేయడం వల్ల పలు ఇబ్బందులు తప్పాయని మంత్రి వెల్లడించారు. భారీ వర్షాల నేపథ్యంలో జీహెచ్ఎంసీలో కంట్రోల్ రూమ్ ఏర్పాటు చేసినట్లు వివరించారు. ఎలాంటి పరిస్థితులనైనా ఎదుర్కొనేలా అధికార యంత్రాంగం సన్నద్ధంగా ఉందని వెల్లడించారు.