Talasani: హైదరాబాద్‌లో ఈ ఏడాది ముంపు ప్రభావం తగ్గుతుంది: తలసాని

హైదరాబాద్‌: గతంతో పోల్చితే ఈ ఏడాది హైదరాబాద్‌లో ముంపు ప్రభావం తగ్గుతుందని మంత్రి తలసాని శ్రీనివాస్‌ యాదవ్ అన్నారు. వచ్చే ఏడాది వేసవి నాటికి ముంపు ప్రభావం లేకుండా చేస్తామని చెప్పారు. జీహెచ్‌ఎంసీ కార్యాలయంలో మరో మంత్రి మహమూద్ అలీ, మేయర్‌ విజయలక్ష్మితో కలిసి పట్టణ ప్రగతిపై తలసాని సమీక్ష నిర్వహించారు. ఈ సందర్భంగా ఆయన మాట్లాడుతూ వర్షాకాలంలో తలెత్తే ఇబ్బందులపైనే పట్టణ ప్రగతిలో ఎక్కువగా దృష్టి సారించామని చెప్పారు.

మున్సిపల్‌శాఖ మంత్రిగా కేటీఆర్‌ వచ్చిన తర్వాత నగరంలో దీర్ఘకాలికంగా ఉన్న చాలా సమస్యలకు పరిష్కారం దొరికిందని తలసాని చెప్పారు. పట్టణ ప్రగతి విజయవంతానికి అన్ని పార్టీల ఎమ్మెల్యేలు, ఎమ్మెల్సీలు సహకారం అందించాలని కోరారు. ఈ కార్యక్రమం కింద హైదరాబాద్‌లో చేపట్టాల్సిన పనులపై చర్చించారు. ఈ సమీక్ష సమావేశంలో జీహెచ్‌ఎంసీ పరిధిలోని ఎమ్మెల్యేలు, ఎమ్మెల్సీలు, డిప్యూటీ మేయర్‌, జీహెచ్‌ఎంసీ ఉన్నతాధికారులు పాల్గొన్నారు.