Vizianagaram: పుదుచ్చేరి-హావ్‌డా ఎక్స్‌ప్రెస్‌లో పొగలు

జామి: పుదుచ్చేరి నుంచి హావ్‌డా వెళ్తున్న సూపర్‌ఫాస్ట్‌ ఎక్స్‌ప్రెస్‌లో పొగలు వచ్చాయి. దీంతో రైలు అరగంట పాటు నిలిచిపోయింది. వివరాల్లోకి వెళితే.. విజయనగరం జిల్లా అలమండ సమీపంలోని భీమసింగి వంతెన పైనుంచి రైలు వెళ్తోంది. అదే సమయంలో ఓ ఏసీ బోగీ వద్ద పొగలు వచ్చాయి. వంతెన పక్కనే ఉన్న పొలాల్లో ఉన్న పశువుల కాపరి పద్మనాభం ఈ విషయాన్ని గమనించి రైలులోని ప్రయాణికులను అప్రమత్తం చేశాడు. దీంతో ప్రయాణికులు చైన్‌ లాగడంతో రైలు ఆగింది. ఆ తర్వాత రైల్వే గార్డు పరిశీలించి బ్రేక్‌ బైండింగ్‌ (బ్రేక్‌ వేసినప్పుడు వేడి పెరిగి పొగలు రావడం)గా గుర్తించారు. ఎలాంటి ప్రమాదం లేదని తేలడంతో రైలు మళ్లీ హావ్‌డా వైపు బయల్దేరింది.