TS corona update: తెలంగాణలో కొత్తగా 195 కరోనా కేసులు.. ఒకరి మృతి

హైదరాబాద్‌: తెలంగాణ రాష్ట్రంలో గత 24గంటల్లో 37,108 కరోనా నిర్ధారణ పరీక్షలు నిర్వహించగా.. కొత్తగా 195 పాజిటివ్‌ కేసులు నమోదయ్యాయి. దీంతో మొత్తంగా ఇప్పటివరకు నమోదైన కేసుల సంఖ్య 6,77,138కి చేరింది. ఈ మేరకు వైద్య ఆరోగ్యశాఖ బులిటెన్‌ విడుదల చేసింది. నిన్న కరోనాతో ఒకరు మృతి చెందారు. దీంతో మృతుల సంఖ్య 4,000కి చేరింది. కరోనా బారి నుంచి నిన్న 171 మంది కోలుకున్నారు. రాష్ట్రంలో ప్రస్తుతం 3,810 యాక్టివ్‌ కేసులు ఉన్నాయి.

గడిచిన 24 గంటల వ్యవధిలో ఎట్‌ రిస్క్ దేశాల నుంచి శంషాబాద్‌లోని రాజీవ్‌గాంధీ అంతర్జాతీయ విమానాశ్రయానికి (ఆర్‌జీఐఏ) 535 మంది చేరుకున్నారు. వీరిలో ఎవరికీ కొవిడ్ నిర్ధారణ కాలేదు. ఇప్పటివరకు విదేశాల నుంచి వచ్చిన వారిలో 13 మందికి కొవిడ్‌ పాజిటివ్‌గా తేలింది. ఈ 13 మంది నమూనాలను జీనోమ్‌ సీక్వెన్సింగ్‌కు అధికారులు పంపించారు. జీనోమ్‌ సీక్వెన్సింగ్‌ ఫలితాల్లో 13 మందికి నెగెటివ్‌ వచ్చింది.