Telangana High Court: జీవో ఉద్దేశమేంటి?రాసిందేంటి?

తెలంగాణ సీఎస్‌ను ప్రశ్నించిన హైకోర్టు
ఆ నిధులు భూసేకరణ పరిహారం చెల్లింపునకు అని సీఎస్‌ వివరణ

హైదరాబాద్‌: కోర్టు ధిక్కరణ కేసుల కోసం రూ.58కోట్లు కేటాయించడంపై తెలంగాణ సీఎస్‌ సోమేశ్‌కుమార్‌ హైకోర్టుకు వివరణ ఇచ్చారు. ఆ నిధులు కోర్టు ధిక్కరణ కేసుల కోసం కాదని.. ఆ కేసుల్లో భూ సేకరణ పరిహారం చెల్లింపునకు అని సీఎస్‌ తరఫున అడ్వొకేట్‌ జనరల్ (ఏజీ) ప్రసాద్‌ కోర్టుకు తెలిపారు. పిటిషనర్‌ కోర్టును తప్పుదోవ పట్టించారని సోమేశ్‌కుమార్‌ ఆ వివరణలో పేర్కొన్నారు. నిధులు విడుదల చేయొద్దన్న ఆదేశాలు ఉపసంహరించాలని కోరారు. జీవో రాసిన తీరుపై ఈ సందర్భంగా హైకోర్టు ఆశ్చర్యం వ్యక్తం చేసింది. ఉద్దేశం ఏమిటి? కాగితంపై రాసిందేంటని ప్రశ్నించింది. ధిక్కరణ కేసుల ఖర్చుల కోసమే అన్నట్లుగానే జీవో కనిపిస్తోందని వ్యాఖ్యానించింది. జీవో ఎలా రాశారో న్యాయశాఖ చూడాలి కదా అని ఆక్షేపించింది. అనంతరం దీనిపై తదుపరి విచారణను సోమవారానికి వాయిదా వేసింది.