Andhra News: ఆలూరులో పదో తరగతి లెక్కల ప్రశ్నపత్రం లీక్‌ కలకలం

ఆలూరు గ్రామీణం: కర్నూలు జిల్లా ఆలూరులో పదో తరగతి ప్రశ్నాపత్రం లీక్‌ కావడం కలకలం రేపింది. సోమవారం పదో తరగతి లెక్కల పరీక్షకు సంబంధించిన ప్రశ్నాపత్నం సెల్‌ఫోన్‌లో ప్రత్యక్షమైంది. పరీక్ష జరుగుతుండగా ఓ యువకుడు అతని స్నేహితులకు కాపీ చిట్టీలు వేసేందుకు వెళ్లాడు. ఆ సమయంలో అక్కడ విధుల్లో ఉన్న ఎస్సై యువకుడిని గుర్తించి పట్టుకున్నారు. అతని వద్ద ఉన్న సెల్‌ఫోన్‌ను తీసి పరిశీలించగా ప్రశ్నాపత్రం కనిపించింది. ఎస్సై ఈ విషయాన్ని వెంటనే ఉన్నతాధికారుల దృష్టికి తీసుకెళ్లారు. స్పందించిన ఎస్పీ సుధీర్‌కుమార్‌రెడ్డి రంగంలోకి దిగి  ఆలూరులో సర్కిల్‌ కార్యాలయంలో విచారణ చేపట్టారు. ప్రశ్నాపత్రం ఎలా వచ్చింది..? ఎవరు పంపారు..? పేపర్‌ లీక్‌లో ఎవరెవరి హస్తం ఉందన్న దానిపై విచారణ చేపట్టారు.