Teachers: బదిలీలు ఆపాలంటూ 24 మంది విద్యార్థులను బంధించిన టీచర్లు

లఖింపూర్‌: వారి బదిలీలను రద్దు చేయాలని పై అధికారులపై ఒత్తిడి తెచ్చేందుకు ఇద్దరు ఉపాధ్యాయులు చేసిన పనికి అందరూ నివ్వెరపోయారు. 24 మంది విద్యార్థులను పాఠశాల పైకప్పుపై ఉంచి తలుపులకు తాళం వేశారు. ఈ ఘటన లఖింపూర్‌ ఖేరీ జిల్లాలోని బెహ్జామ్ ప్రాంతంలో ఉన్న కస్తూర్బా గాంధీ బాలికా విద్యాలయంలో చోటుచేసుకుంది. కొన్ని గంటల తర్వాత పోలీసులు తిరిగి బాలికలను వారి హాస్టల్‌కు పంపారు. వివరాల్లోకి వెళితే.. బెహ్జామ్‌లోని కస్తూర్బా గాంధీ బాలికా విద్యాలయంలోని ఇద్దరు ఉపాధ్యాయులను కొన్ని కారణాల వల్ల ఇటీవల బదిలీ చేశారు. దీంతో వారు బదిలీలను రద్దు చేయాలని అధికారులపై ఒత్తిడి తెచ్చారు. ఎంతకూ రద్దు చేయకపోవడంతో ఇలా విద్యార్థులను బంధించారని ప్రాథమిక విద్యా అధికారి లక్ష్మీకాంత్‌ పాండే తెలిపారు. ఇద్దరు ఉపాధ్యాయులపై పలు సెక్షన్‌ల కింద ఎఫ్‌ఐఆర్‌ నమోదు చేసినట్లు పాండే తెలిపారు. ఈ విషయంపై శాఖపరమైన విచారణకు కూడా ఆదేశించారు.