Kolkata: భవనం కుప్పకూలిన ఘటనలో తొమ్మిదికి చేరిన మృతులు

కోల్‌కతా: పశ్చిమ బెంగాల్‌ (West Bengal) రాజధాని కోల్‌కతా (Kolkata)లో అక్రమంగా నిర్మిస్తున్న ఐదు అంతస్తుల భవనం కుప్పకూలిన ఘటనలో మృతుల సంఖ్య తొమ్మిదికి చేరింది. 17 మందికి గాయాలయ్యాయి. పలువురు శిథిలాల కింద చిక్కుకున్నట్లు సమాచారం. మృతుల్లో ఇద్దరు మహిళలు ఉన్నారు. ఇంకా సహాయక చర్యలు కొనసాగుతున్నాయి.

ఆదివారం అర్ధరాత్రి దాటిన తర్వాత జరిగిన ఈ ఘటనలో భవనం పక్కనే ఉన్న గుడిసెలపై శిథిలాలు పడ్డాయి. సమాచారం అందుకున్న అధికారులు సహాయక చర్యలు చేపట్టారు. ఘటన జరిగిన స్థలాన్ని ముఖ్యమంత్రి మమతా బెనర్జీ అధికారులతో కలిసి పరిశీలించారు. బాధితులను పరిమర్శించారు. అక్రమ నిర్మాణాలపై కఠిన చర్యలు తీసుకుంటామని పేర్కొన్నారు. మృతుల కుటుంబాలకు ప్రభుత్వం తరఫున రూ.5 లక్షల చొప్పున పరిహారం ప్రకటించారు.

బాగా రద్దీ ప్రాంతమైన గార్డెన్‌ రీచ్‌ ఏరియాలో 500 చదరపు అడుగుల్లో ఈ భవన నిర్మాణం చేపట్టారని పోలీసులు తెలిపారు. ఈ ప్రాజెక్టు నిర్మాణానికి అనుమతులు ఇచ్చిన ముగ్గురు ఇంజినీర్లకు షోకాజ్‌ నోటీసులు ఇచ్చినట్లు ఉన్నతాధికారులు వెల్లడించారు. భవనం కుప్పకూలిన ప్రాంతంలో సుమారు 800 అక్రమ నిర్మాణాలు చేపట్టారని భాజపా శాసనసభా పక్ష నేత సువేందు అధికారి విమర్శలు గుప్పించారు. అక్రమ నిర్మాణాలకు సంబంధించి కేంద్ర సంస్థలతో విచారణ చేయించాలని డిమాండ్‌ చేశారు.