మలబార్‌ నేవీ విన్యాసాల్లోకి ఆస్ట్రేలియా: కేంద్రం

దిల్లీ: చైనాతో సరిహద్దుల్లో ఉద్రిక్త పరిస్థితులు కొనసాగుతున్న క్రమంలో భారత్‌ మరో కీలక ప్రకటన చేసింది. ఈ ఏడాది మలబార్‌ నౌకాదళ విన్యాసాల్లో ఆస్ట్రేలియా కూడా పాల్గొననుందని కేంద్రం సోమవారం ప్రకటించింది. ఇప్పటి వరకు ఈ ప్రక్రియలో క్వాడ్‌ బృందానికి చెందిన యూఎస్‌, జపాన్‌, భారత్‌లు మాత్రమే పాల్గొనేవి. కానీ ఈ సంవత్సరం జరగబోయే మలబార్‌ నౌకాదళ విన్యాసాల్లో ఆస్ట్రేలియా కూడా పాల్గొననున్నట్లు భారత రక్షణ శాఖ ఓ ప్రకటనలో వెల్లడించింది. ఈ విషయాన్ని ఆస్ట్రేలియా విదేశాంగ మంత్రి మారిస్‌ పేన్‌ సైతం నిర్ధరించారు. ఈ ఏడాది నవంబర్‌లో బే ఆఫ్‌ బెంగాల్‌, అరేబియా సముద్రంలో నాలుగు దేశాల భాగస్వామ్యంతో ఈ విన్యాసాలు నిర్వహించనున్నారు. చైనా సరిహద్దుల్లో ఉద్రిక్తతలు నెలకొన్న నేపథ్యంలో భారత్‌ ఈ ప్రకటన చేయడం ప్రాధాన్యత సంతరించుకుంది. 

‘సముద్ర భద్రత రంగంలో ఇతర దేశాలతో పరస్పర సహకారాన్ని పెంపొందించడానికి భారత్‌ ప్రయత్నిస్తోంది. ఇందులో భాగంగా ఈ ఏడాది నవంబర్‌లో నిర్వహించబోయే మలబార్‌ నావల్‌ డ్రిల్‌లో ఆస్ట్రేలియా కూడా పాల్గొననుంది. ఈ విన్యాసాలు క్వాడ్‌ దేశాల నేవీల మధ్య పరస్పర సహకారాన్ని బలోపేతం చేస్తుంది’అని రక్షణ శాఖ ఓ ప్రకటనలో పేర్కొంది. 

ఆస్ట్రేలియా రక్షణ మంత్రి లిందా రెనాల్డ్స్‌ మాట్లాడుతూ.. ‘మలబార్‌ వంటి ఉన్నత స్థాయిలో నిర్వహించే ప్రక్రియలు ఆస్ట్రేలియా నేవీ సామర్థ్యాలను మెరుగుపరుస్తాయి. అంతేకాకుండా  సన్నిహిత భాగస్వామ్య దేశాలతో సంబంధాలు మెరుగవుతాయి. ఈ ప్రక్రియ నాలుగు దేశాల మధ్య నమ్మకాన్ని ప్రదర్శిస్తోంది’అని తెలిపారు. ఈ మలబార్‌ డ్రిల్‌ ప్రక్రియను 1992లో భారత్‌, అమెరికా నేవీలు ద్వైపాక్షికంగా ప్రారంభించారు. అనంతరం 2015లో జపాన్‌ సైతం ఇందులో భాగస్వామిగా చేరింది. గత కొద్ది సంవత్సరాలుగా ఆస్ట్రేలియా సైతం ఈ ప్రక్రియపై ఆసక్తి చూపుతోంది. గతేడాది జపాన్‌ తీరంలో ఈ విన్యాసాలు నిర్వహించిన విషయం తెలిసిందే.