Birbhum killings: చంపాలనే ఉద్దేశంతోనే ఇళ్లకు నిప్పు.. 21 మందిపై ఎఫ్‌ఐఆర్‌

కోల్‌కతా: పశ్చిమ బెంగాల్‌లోని బీర్‌భూం జిల్లాలో 8 మంది సజీవ దహనం కేసు దర్యాప్తును సీబీఐ వేగవంతం చేసింది. ఈ నేపథ్యంలోనే కీలక విషయాలను వెల్లడించింది. ఈ కేసులో 21 మంది అనుమానితుల పేర్లను ఎఫ్‌ఐఆర్‌లో నమోదు చేసినట్లు తెలిపింది. ‘ప్రతీకారం’తోనే ఈ హత్యలు జరిపినట్లు పేర్కొంది. తృణమూల్‌ కాంగ్రెస్‌ పార్టీ (టీఎంసీ)కి చెందిన బర్షాల్‌ గ్రామ పంచాయతీ ఉప ప్రధాన్‌ భాదు షేక్‌ హత్యకు ప్రతీకారంగానే ఈ హత్యలు జరిగినట్లు స్పష్టం చేసింది. వ్యక్తులను చంపాలనే ఉద్దేశంతోనే 70-80 మంది వ్యక్తుల గుంపు బాధితులను ఇళ్లలో ఉంచి నిప్పు పెట్టినట్లు సీబీఐ ఎఫ్‌ఆర్‌ నమోదు చేసింది.

ఈ కేసు దర్యాప్తు చేపట్టాలని హైకోర్టు శుక్రవారం సీబీఐని ఆదేశించింది. ఏప్రిల్‌ 7లోగా దర్యాప్తు నివేదికను తమకు సమర్పించాలని జస్టిస్‌ ప్రకాశ్‌ శ్రీవాస్తవ, జస్టిస్‌ ఆర్‌.భరద్వాజలతో కూడిన ధర్మాసనం తెలిపింది. ఈ కేసుకు సంబంధించిన వివరాలను, నిందితులను సీబీఐకి అప్పగించాలని బెంగాల్‌ ప్రభుత్వం ఏర్పాటుచేసిన సిట్‌కు ఆదేశాలు జారీ చేసింది.  బీర్‌భూం కేసును హైకోర్టు సుమోటోగా స్వీకరించిన విషయం తెలిసిందే. తదుపరి విచారణ ఏప్రిల్‌ 7న ఉంటుంది.

మార్చి 21 అర్ధరాత్రి జరిగిన ఈ దుర్ఘటనలో దుండగులు బోగ్‌టూయిలోని పది ఇళ్లకు నిప్పు పెట్టారు. ఇద్దరు పిల్లలు సహా 8 మంది బుగ్గిపాలయ్యారు. హత్యకు ముందు బాధితులను  కొట్టి అనంతరం సజీవదహనం చేసినట్లు పోస్టుమార్టం నివేదిక వెల్లడించింది. ఈ కేసులో ఇప్పటివరకు 20 మందిని అరెస్టు చేయగా.. పలువురు పోలీసులను సస్పెండు చేశారు. ఈ సంఘటన దేశవ్యాప్తంగా అందరినీ కలచివేసిందని, కేంద్ర దర్యాప్తు సంస్థకు రాష్ట్రం సహకరించాలని కోర్టు సూచించింది.