Brinda Karat: బుల్‌డోజర్లను అడ్డుకున్న బృందా కారాట్‌

దిల్లీ: రాజధానిలోని జహంగీర్‌పురి ప్రాంతంలో స్పెషల్‌ డ్రైవ్‌ పేరిట జరుగుతున్న నిర్మాణాల కూల్చివేతను నిలిపివేయాలని సుప్రీం ఇచ్చిన ఆదేశాలు చూపిస్తూ సీపీఎం నేత బృందా కారాట్‌ బుల్‌డోజర్లకు అడ్డుగా నిలిచారు. ఉత్తర దిల్లీ మున్సిపల్‌ పౌరసంఘం జారీ చేసిన ఈ ఆక్రమణల వ్యతిరేక డ్రైవ్‌ను సంబంధిత అధికారులు ఆపడానికి నిరాకరించారు. తమకు పై నుంచి ఎలాంటి ఆదేశాలు అందలేదని నిర్మాణాలను కూల్చివేయడం కొనసాగించారు. దీంతో రెండు గంటల పాటు ఆ ప్రాంతంలో ఉద్రిక్త వాతావరణం నెలకొంది. హనుమాన్‌ జయంతి  రోజు ఊరేగింపు సందర్భంగా సంబంధిత ప్రాంతంలో మతపరమైన ఘర్షణలు చోటుచేసుకున్నాయి. అనంతరం అక్రమ కట్టడాలను కూల్చివేయాలని నగరపాలక అధికారులు నిర్ణయించారు.  ఈ కూల్చివేతలపై సుప్రీంకోర్టులో పిటిషన్‌ దాఖలు చేశారు. న్యాయస్థానం ఆ కూల్చివేతలను నిలిపివేయాల్సిందిగా ఆదేశించింది.