Cow Hug day: ఫిబ్రవరి 14 వాలంటైన్స్‌ డే కాదు.. కౌ హగ్‌ డే..!

దిల్లీ: ఫిబ్రవరి 14.. మనందరికీ గుర్తొచ్చేది ప్రేమికుల రోజే (Valentines Day). ప్రేమలో ఉన్న యువతీ యువకులు బహుమతులిచ్చి ఒకరిని ఒకరు సర్‌ప్రైజ్‌ చేసుకుంటారు. మరికొందరు అదే రోజు మన ప్రేమను వ్యక్త పరుస్తుంటారు. అయితే, ప్రేమికుల రోజు అనేది మన సంప్రదాయం కాదని, దాన్ని వీడాలని చెప్పేవారూ ఉన్నారు. ఈ నేపథ్యంలో ఫిబ్రవరి 14ను కౌ హగ్‌ డేగా (Cow Hug Day) జరుపుకోవాలని యానిమల్‌ వెల్ఫేర్‌ బోర్డు ఆఫ్‌ ఇండియా భారత ప్రజలకు విజ్ఞప్తి చేసింది.

గోమాత ప్రాధాన్యతను గుర్తించి గో ప్రేమికులంతా ఫిబ్రవరి 14 రోజున ఆవులను ఆలింగనం చేసుకోవాలని పశుసంవర్థక, పాడిపరిశ్రమ విభాగానికి చెందిన జంతు సంరక్షణ బోర్డు తన ఉత్తర్వుల్లో పేర్కొంది. గోవులు భారత సంస్కృతీ సంప్రదాయాలకు, గ్రామీణ ఆర్థిక వ్యస్థకు వెన్నెముక అని పేర్కొంది. అలాంటి గోవులను ఆలింగనం చేసుకోవడం ద్వారా దేహంలోకి సానుకూల శక్తి ప్రవహించడంతో పాటు మానసికోల్లాసం కలుగుతుందని పేర్కొంది. వేదాల్లో వీటి ప్రస్తావన ఉన్నప్పటికీ.. పాశ్చాత్య నాగరికత ప్రభావంతో మనం మరిచిపోతున్నామని ఆవేదన వ్యక్తంచేసింది. కాబట్టి గో ప్రేమికులంతా ‘కౌ హగ్‌ డే’ను జరుపుకోవాలని విజ్ఞప్తి చేసింది.