Delhi Liquor scam: మనీశ్‌ సిసోదియాకు మరోసారి బెయిల్‌ నిరాకరణ

దిల్లీ: మద్యం కుంభకోణం కేసులో మనీలాండరింగ్‌ ఆరోపణలపై అరెస్టయిన దిల్లీ మాజీ ఉప ముఖ్యమంత్రి, ఆమ్‌ ఆద్మీ పార్టీ (AAP) నేత మనీశ్ సిసోదియా (Manish Sisodia)కు దిల్లీ హైకోర్టు(Delhi High court)లో మరోసారి నిరాశే ఎదురైంది. ఆయన దాఖలు చేసిన బెయిల్‌ పిటిషన్‌ను ఉన్నత న్యాయస్థానం సోమవారం కొట్టివేసింది. ఈ దశలో బెయిల్‌ మంజూరు చేయలేమని న్యాయమూర్తి తేల్చి చెప్పారు. సిసోదియాతో పాటు ఇదే కేసులో సహ నిందితులుగా ఉన్న అభిషేక్‌ బోయినపల్లి, వినయ్‌బాబు, విజయ్‌ నాయర్‌కు సైతం బెయిల్‌ ఇచ్చేందుకు నిరాకరించారు.

మద్యం కుంభకోణం కేసులో మనీశ్ సిసోదియాను ఫిబ్రవరి 26న సీబీఐ అధికారులు అరెస్టు చేసిన విషయం తెలిసిందే. ఆ తర్వాత  ఈ కేసులో మనీలాండరింగ్ ఆరోపణలపై మే 9న ఈడీ అధికారులు అరెస్టు చేసి తిహాడ్‌ జైలులోనే విచారించారు. ప్రస్తుతం ఆయన జ్యుడీషియల్‌ కస్టడీలో ఉన్నారు. గతంలో మే 30న బెయిల్‌ కోసం దిల్లీ హైకోర్టును ఆశ్రయించగా నిరాశ ఎదురవ్వగా..  తాజాగా మరోసారి ఆయన దాఖలు చేసిన బెయిల్‌ పిటిషన్‌ను ఉన్నత న్యాయస్థానం కొట్టివేసింది.