అమెరికా చర్యని తిప్పికొడతాం: రౌహానీ

టెహ్రాన్‌: తమ దేశ నిఘా విభాగం అధిపతి జనరల్‌ ఖాసీం సోలెమన్‌ హత్య నేపథ్యంలో అమెరికాపై ఇరాన్‌ అధ్యక్షుడు హసన్‌ రౌహానీ తీవ్ర స్థాయిలో మండిపడ్డారు. ఇరాన్‌ సహా ఈ ప్రాంతంలోని ఇతర దేశాలు అమెరికాపై తీవ్ర స్థాయిలో ప్రతీకారం తీర్చుకుంటాయని హెచ్చరించారు. నేరపూరితమైన అమెరికా చర్యని తప్పకుండా తిప్పికొడతామన్నారు. ఈ మేరకు ఆయన తన సందేశాన్ని ఆ దేశ అధికార వెబ్‌సైట్‌లో ఉంచారు. 

మరోవైపు సోలెమన్‌ హత్య నేపథ్యంలో ఇరాక్‌ వీధుల్లో ప్రభుత్వ వ్యతిరేకదారులు సంబరాలు జరుపుకొంటున్నారని మీడియా కథనాలు వెలువడుతున్నాయి. గత కొన్ని నెలలుగా బాగ్దాద్‌లో వారి ఆందోళనలకు వేదికగా మారిన తాహిర్‌ స్క్వేర్‌లో సంబరాలు జరుపుకొంటున్నారని సమాచారం. నినాదాలు చేస్తూ.. ఇరాక్‌ జాతీయ పతాకాలతో ఊరేగింపు నిర్వహించినట్లు వార్తలు వస్తున్నాయి. ఇదే విషయాన్ని అమెరికా విదేశాంగ మంత్రి మైక్‌ పాంపియో సైతం ట్విటర్‌ వేదికగా వెల్లడించారు.