ఇరాక్‌  నుంచి వచ్చేయండి..

విమానాలు, ఓడలు పంపుతున్న ఫిలిప్పీన్స్‌

మనీలా: అమెరికా, ఇరాన్‌ పరస్పర దాడులతో ఇరాక్‌లో ఉద్రిక్త వాతావరణం నెలకొంది. తాజా పరిస్థితుల దృష్ట్యా భారత్‌ సహా ప్రపంచ దేశాలన్నీ అప్రమత్తమయ్యాయి. ఇరాక్‌లో ఉంటున్న తమ తమ దేశ పౌరులకు హెచ్చరికలు చేశాయి. ఫిలిప్పీన్స్‌ మరో అడుగు ముందుకేసి.. తమ దేశ పౌరులు తక్షణమే ఇరాక్‌ వదలి రావాలని ఆదేశించింది. ఇందుకోసం కార్గో విమానాలు, ఓడలను ఆ దేశానికి పంపుతోంది. 

ఇరాక్‌లోని అమెరికా సైనిక స్థావరాలపై ఇరాన్‌ క్షిపణి దాడుల తర్వాత ఫిలిప్పీన్స్‌ తప్పనిసరి ఆదేశాలు జారీ చేసింది. తమ దేశం నుంచి ఇరాక్‌కు వెళ్లిన వలస కార్మికులు వెంటనే అక్కడి నుంచి రావాలని ఆదేశించింది. వీరిని స్వదేశానికి తీసుకొచ్చేందుకు మూడు మిలిటరీ కార్గో విమానాలు, ఓ ఓడను పంపుతున్నట్లు ఫిలిప్పీన్స్‌ రక్షణ మంత్రి తెలిపారు. ఇటీవల ఫ్రాన్స్‌ నుంచి బయల్దేరిన ఓ ఓడ ఇరాక్‌ వెళ్లి కూలీలను తీసుకొస్తుందని అన్నారు. తొలుత వారిని ఖతార్‌, లొరెంజానా తరలించి అక్కడి నుంచి విమానాలు, ఓడల ద్వారా స్వదేశానికి తీసుకొస్తామన్నారు. దాదాపు 1600 మంది ఫిలిప్పినో కార్మికులు ఇరాక్‌లో ఉన్నారు.