అత్యవసర కేసులే విచారిస్తాం: సుప్రీం

దిల్లీ: దేశంలో కరోనా వైరస్‌ అంతకంతకూ విస్తరిస్తున్న నేపథ్యంలో సుప్రీం కోర్టు కీలక నిర్ణయం తీసుకుంది. అత్యవసర కేసుల విచారణ మాత్రమే చేపట్టాలని నిర్ణయించింది. కేసుకు సంబంధించి న్యాయవాదులు మినహా ఎవరికీ లోపలికి అనుమతి లేదని స్పష్టం చేసింది. ఈ మేరకు సుప్రీం కోర్టు ప్రధాన న్యాయమూర్తి జస్టిస్‌ ఎస్‌ఏ బోబ్డే ఆధ్వర్యంలో జరిగిన సమావేశంలో నిర్ణయం తీసుకున్నారు.

కరోనా వైరస్‌ వ్యాప్తిని అడ్డుకోవడానికి సమూహాలుగా ఏర్పడకూడదంటూ కేంద్ర ప్రభుత్వం జారీ చేసిన సూచనల మేరకు ఈ  నిర్ణయం తీసుకున్నట్లు సుప్రీం కోర్టు ఓ నోటిఫికేషన్‌ విడుదల చేసింది. కోర్టుకు వచ్చే సందర్శకులు, కక్షిదారులు, లాయర్లు, కోర్టు సిబ్బంది, విలేకరుల సంక్షేమాన్ని దృష్టిలో ఉంచుకుని అత్యవసర కేసులు మాత్రమే విచారించాలని నిర్ణయించినట్లు పేర్కొంది. కోర్టు రూముల్లోకి కేసుకు సంబంధించిన లాయర్లు మినహా ఇతరులకు ప్రవేశం లేదని పేర్కొంది.