వీధుల్లో విక్రయించే ఆహారానికీ నాణ్యతా నిబంధనల వర్తింపు: కేంద్రం యోచన

దిల్లీ: బజ్జీలు, పునుగులు, పకోడీ తదితర చిరుతిళ్లతో పాటు అల్పాహారాలు, ఇతర ఆహార పదార్థాలు అందించే వీధి వ్యాపారులూ నాణ్యతా ప్రమాణాలు పాటించేలా చేయాలని కేంద్ర ప్రభుత్వం యోచిస్తోంది. నాణ్యత నిబంధనల నియంత్రణల పరిధిలోకి ఆ వ్యాపారులను తీసుకురావడంపై మార్గాన్వేషణ చేస్తున్నట్లు డిపార్ట్‌మెంట్‌ ఫర్‌ ప్రమోషన్‌ ఆఫ్‌ ఇండస్ట్రీ అండ్‌ ఇంటర్నల్‌ ట్రేడ్‌ కార్యదర్శి రాజేశ్‌ కుమార్‌ సింగ్‌ గురువారం వెల్లడించారు. ఇది కష్టతరమైన వ్యవహారమే అయినప్పటికీ అమలులోకి తీసుకురావాల్సిన ఆవశ్యకత ఉందన్నారు. ఇదే అంశంలో ఇతర దేశాల్లో ఎలాంటి నిబంధనలు ఉన్నాయో సమాచారాన్ని సేకరిస్తామని తెలిపారు. భారత ఆహార భద్రత, ప్రమాణాల ప్రాధికార సంస్థ (ఎఫ్‌ఎస్‌ఎస్‌ఏఐ) నిర్వహించిన ప్రపంచ ఆహార నియంత్రణల సదస్సులో మాట్లాడుతూ ఆయన ఈ విషయాన్ని తెలిపారు.