రైళ్లలో వృద్ధుల రాయితీ కొనసాగించలేం

పార్లమెంటులో మంత్రి జవాబు

దిల్లీ: ప్రయాణికుల రాయితీలతో మోయలేని భారం పడుతోందని రైల్వేశాఖ మంత్రి అశ్వనీ వైష్ణవ్‌ పేర్కొన్నారు. కొందరు మినహా అన్ని వర్గాలవారికీ ఈ సదుపాయాన్ని పునరుద్ధరించే అవకాశాన్ని తోసిపుచ్చారు. ఈ మేరకు బుధవారం లోక్‌సభకు రాతపూర్వక సమాధానమిచ్చారు. ‘‘టికెట్‌ ధర తక్కువగా ఉన్న కారణంగా ప్రయాణ వ్యయంలో సగటున 50 శాతాన్ని రైల్వేయే భరిస్తోంది. ఇది కాకుండా కొవిడ్‌-19 కారణంగా గత రెండేళ్లలో ప్రయాణికుల టికెట్ల ఆదాయం తగ్గిపోయింది. ఇవి రైల్వే ఆర్థిక పరిస్థితిపై దీర్ఘకాలం ప్రభావం చూపిస్తాయి. రాయితీలు ఎంతో భారంగా మారాయి. వయో వృద్ధులు సహా మొత్తం అన్ని వర్గాలకూ రాయితీలను విస్తరించడం వాంఛనీయం కాదు. ఇలాంటి పరిస్థితుల్లో కూడా వైకల్యం ఉన్న నాలుగు విభాగాల వారికి, 11 రకాల రోగులకు, విద్యార్థులకు రాయితీలు కొనసాగిస్తున్నాం’’ అని వివరించారు. 2017-20 మధ్య వయో వృద్ధుల రాయితీల రూపంలో రూ.4,794 కోట్లను కోల్పోయామని చెప్పారు.