సుప్రీంకోర్టుకు సొంత లైవ్‌ ఛానల్‌!

కోర్టు ఔన్నత్యాన్ని కాపాడాలి : సీజేఐ

దిల్లీ: న్యాయస్థానంలో జరిగే కేసుల విచారణ ప్రత్యక్ష ప్రసారాలకు గాను సొంతంగా మౌలిక సదుపాయాలను సమకూర్చుకొనే ప్రయత్నం చేస్తున్నట్లు సుప్రీంకోర్టు శుక్రవారం వెల్లడించింది. అర్హులైన న్యాయవాదులకు, న్యాయ కళాశాలలకు వీటి అనుమతులు ఇస్తామని.. అత్యున్నత న్యాయస్థానం ఔన్నత్యాన్ని కాపాడవలసిన బాధ్యత తమపై ఉందని పేర్కొంది. కొన్నిసార్లు సమయం, సందర్భం లేకుండా చిన్న క్లిప్పులు సామాజిక మాధ్యమాల్లో ప్రసారం అవుతున్నాయని ప్రధాన న్యాయమూర్తి జస్టిస్‌ డీవై చంద్రచూడ్‌, జస్టిస్‌ హిమా కొహ్లీల ధర్మాసనం అభిప్రాయపడింది. సీనియర్‌ న్యాయవాది ఇందిరా జైసింగ్‌ కోర్టు ప్రత్యక్ష ప్రసారాలపై వాదనలు వినిపిస్తుండగా న్యాయమూర్తులు పై వ్యాఖ్యలు చేశారు. ఈ ప్రసారాలతోపాటు కోర్టు రికార్డుల డిజిటలైజేషనుకు దేశవ్యాప్తంగా ఏకరూప నియమాలు రూపొందించాలని ఆమె కోరారు.