India-Nepal: నేపాల్‌కు భారత్‌ ఆపన్న హస్తం.. భూకంప బాధితుల కోసం సహాయక సామగ్రి

దిల్లీ: నేపాల్‌లో (Nepal) శుక్రవారం రాత్రి సంభవించిన భూకంపం (earthquake) కారణంగా తీవ్ర ప్రాణనష్టం జరిగిన విషయం తెలిసిందే. ఈ నేపథ్యంలో పొరుగు దేశానికి భారత్‌ ఆపన్న హస్తం అందించింది. బాధితులకు అవసరమైన మందులు, ఇతర సహాయక సామగ్రిని పంపించింది. భారత వాయుసేనకు చెందిన విమానంలో వాటిని తరలించింది. ‘‘నేపాల్‌లోని భూకంప ప్రభావిత ప్రాంతాలకు అత్యవసర సాయాన్ని పంపించాం. ప్రధాని నరేంద్ర మోదీ అమలు చేస్తున్న ‘పొరుగువారికి తొలి ప్రాధాన్యం’ విధానంలో భాగంగా భారత్ తొలుత ప్రతిస్పందించి ఔషధాలు, ఇతర ఉపశమన సామగ్రిని అందజేస్తోంది’’ అని కేంద్ర విదేశాంగ మంత్రి ఎస్‌ జై శంకర్‌ ఎక్స్‌ (ట్విటర్‌)లో పోస్టు పెట్టారు. ఈ సహాయ సామగ్రిని నేపాల్‌లోని భారత రాయబారి నవీన్‌ శ్రీవాత్సవ అక్కడి అధికారులకు అందజేశారు. 

నేపాల్‌లో మరోసారి భూకంపం!

నేపాల్‌లో భారీ భూకంపం తీవ్రతకు 157 నిండు ప్రాణాలు బలైపోయాయి. శుక్రవారం రాత్రి 11.47 గంటల ప్రాంతంలో భూమి ఒక్కసారిగా కంపించింది. వాయవ్య నేపాల్‌లోని మారుమూల పర్వత ప్రాంతాల్లో సంభవించిన ఈ విపత్తులో గాయాలపాలైన 150 మందిని చికిత్స నిమిత్తం ఆసుపత్రుల్లో చేర్చారు. ఇళ్లు నేలమట్టమైన ఘటనల్లో రుకమ్‌, జజర్‌కోట్‌ జిల్లాలు ఎక్కువగా.. శనివారం సాయంత్రం వరకు 159 సార్లు భూ ప్రకంపనలు సంభవించాయి. నేపాల్‌ భూకంప తీవ్రతకు భారత్‌లోని పలు ప్రాంతాలు కంపించాయి. దిల్లీతోపాటు యూపీ, బిహార్‌లలో ప్రకంపనలు చోటుచేసుకున్నాయి. ప్రజలు ఉలిక్కిపడి ఇళ్లనుంచి బయటకు వచ్చేశారు. నేపాల్‌ భూకంపంపై ప్రధాని నరేంద్ర మోదీ తీవ్ర దిగ్భ్రాంతి వ్యక్తంచేశారు.