Lalu Yadav: ‘ఫిట్‌’గా ఉన్న లాలూ .. హడావుడిగా ఎయిమ్స్‌ నుంచి డిశ్చార్జ్‌..!

దిల్లీ: ఆర్జేడీ అధినేత లాలూ ప్రసాద్ యాదవ్ ఆరోగ్యం క్షీణించడంతో మంగళవారం రాత్రి దిల్లీ ఎయిమ్స్‌లో చేరారు. కొన్ని గంటలపాటు ఆయన్ను పర్యవేక్షించిన వైద్యులు ‘ఫిట్‌’గా ఉన్నారని ధ్రువీకరించి, పొద్దుపొద్దున్నే 3.30 గంటలకు ఆసుపత్రి నుంచి డిశ్చార్జ్‌ చేశారు. దానికి ముందు ఆయన్ను అత్యవసర విభాగంలో పర్యవేక్షణలో ఉంచారు. 

‘లాలూ ప్రసాద్‌ యాదవ్‌ నిన్న రాత్రి 9 గంటలకు ఎయిమ్స్‌కు వచ్చారు. ఆ తర్వాత ఆయన్ను అత్యవసర విభాగానికి తరలించాం. ఆయన్ను పరీక్షించిన మీదట ఫిట్‌గా ఉన్నారని తేలడంతో.. ఉదయం 3.30 గంటలకు డిశ్చార్జ్‌ చేశాం’ అని ఆసుపత్రి వర్గాలు వెల్లడించాయి. తర్వాత రాంచీలోని రిమ్స్‌కు తరలించారు. అయితే ఆయన్ను అంత అంత పొద్దున్నే డిశ్చార్జ్‌ చేయాల్సిన పనేముందని ఆర్జేడీ తీవ్ర అభ్యంతరం వ్యక్తం చేసింది. 

ప్రస్తుతం లాలూ దాణా కుంభకోణం కేసులో జైలు శిక్ష అనుభవిస్తున్నారు. ఆయన గుండె, మూత్రపిండాల సమస్యతో బాధపడుతున్నారు. ప్రస్తుతం రిమ్స్‌లో చికిత్స పొందుతున్నారు. అయితే మంగళవారం ఆరోగ్యం క్షీణించడంతో.. మెరుగైన చికిత్స కోసం ఎయిమ్స్‌కు వచ్చారు.