US Student Visa: కరోనా వేళ.. రికార్డు స్థాయిలో అమెరికా వీసాలు!

భారత్‌లో అమెరికా ఎంబసీ వెల్లడి

దిల్లీ: ప్రపంచ వ్యాప్తంగా కరోనా వైరస్‌ మహమ్మారి విజృంభణ కొనసాగుతున్న సమయంలోనూ అమెరికా వెళ్లే భారత విద్యార్థులకు రికార్డు స్థాయిలో వీసాలు మంజూరు చేసినట్లు అమెరికా అధికారులు వెల్లడించారు. ఈ ఏడాది (2021) ఇప్పటివరకే దాదాపు 55వేలకు పైగా విద్యార్థులకు వీసా మంజూరు చేశామని చెప్పారు. అంతేకాకుండా ప్రతిరోజు అనుమతి పొందుతున్న వీసాల్లో విద్యార్థులవే ఎక్కువగా ఉంటున్నాయని దిల్లీలోని అమెరికా ఎంబసీ వెల్లడించింది.

‘అమెరికాలో ఉన్నత చదువు అనేది భారత విద్యార్థులకు ఓ ప్రత్యేకమైన అనుభవం. ప్రపంచ దృక్పథాన్ని అలవరచుకోవడంతో పాటు అమూల్యమైన ఉద్యోగ అవకాశాలను అందిపుచ్చుకోవచ్చు. అంతేకాకుండా ఇరుదేశాల మధ్య సంబంధాలను ఇవి మరింత బలోపేతం చేస్తాయి’ అని దిల్లీలోని అమెరికా దౌత్యవేత్త అతుల్‌ కేశప్‌ వెల్లడించారు. కరోనా వైరస్‌ సెకండ్‌ వేవ్ విజృంభణ కారణంగా వీసా ఇంటర్వ్యూ ప్రక్రియ రెండు నెలలు వాయిదా పడిందన్నారు. మే నెలలో ప్రారంభం కావాల్సి ఉన్నప్పటికీ జులై నెలలో మొదలుపెట్టామని చెప్పారు. విద్యార్థులకు సెమిస్టర్‌ నష్టం కలుగకుండా ఉండేందుకు వీలైనంత వేగంగా వీసా మంజూరు ప్రక్రియను కొనసాగించామన్నారు. కరోనా వైరస్‌ మహమ్మారి విజృంభిస్తోన్న సమయంలోనూ భారతీయ విద్యార్థులకు మునుపెన్నడూ లేని విధంగా వీసాలు మంజూరు చేశామన్నారు. ఇందుకోసం అమెరికా విదేశాంగ విభాగ సిబ్బంది చేసిన కృషిని ఆయన ప్రశంసించారు. ఈ కృషి ఫలితంగానే రికార్డు స్థాయిలో భారత విద్యార్థులకు వీసాలను మంజూరు చేయగలిగామని అతుల్‌ కేశప్‌ పేర్కొన్నారు.