Tiger: ఆ ‘సూపర్‌ మామ్‌ టైగర్‌’ మృతికి సీఎం, కేంద్రమంత్రి నివాళి

దిల్లీ: మధ్యప్రదేశ్‌లోని పెంచ్‌ టైగర్‌ రిజర్వ్‌లో లెజెండరీ ఆడపులి ‘కొల్లార్‌వాలి’ మృతి పట్ల కేంద్ర పర్యావరణశాఖ మంత్రి భూపేంద్ర యాదవ్‌ స్పందించారు. 29 పులులకు జన్మనిచ్చిన ఈ ‘పెంచ్‌ టైగర్‌ రిజర్వ్‌ క్వీన్‌’ మరణం తీరని లోటుగా అభివర్ణించారు. సూపర్‌ మామ్‌గా పిలవబడే ‘కొల్లార్‌వాలి‘ మన దేశంలో పులుల జనాభాను పెంచడం ద్వారా పర్యావరణ సమతుల్యతను పునరుద్ధరించడంలో చేసిన మేలు ఎప్పటికీ గుర్తుండిపోతుందంటూ ఆయన ట్విట్‌ చేశారు. మరోవైపు, ఈ పులి మరణించిన విషయం తెలిసి మధ్యప్రదేశ్ సీఎం శివరాజ్‌సింగ్‌ చౌహాన్‌ కూడా నివాళులర్పించారు. మధ్యప్రదేశ్ ‘టైగర్‌ స్టేట్‌’ హోదా సాధించడంలో కీలక పాత్ర పోషించిన ఈ పులి తమ రాష్ట్రానికి గర్వకారణమన్నారు. ఈ ‘పెంచ్‌ టైగర్‌ రిజర్వ్‌ క్వీన్‌’ పిల్లల గర్జనతో మధ్యప్రదేశ్ అడవులు ఎప్పుడూ ప్రతిధ్వనిస్తాయని పేర్కొన్నారు. 

దాదాపు 17 ఏళ్లు జీవించిన ఈ పులి 11 ఏళ్ల వ్యవధిలో ఎనిమిది ఈతల్లో ఒకటికాదు, రెండు కాదు ఏకంగా 29 పులులకు జన్మనిచ్చింది. వయో భారంతో నీరసించిపోవడంతో గత వారం రోజులుగా వైద్యులు చికిత్స అందించారు. ఈ క్రమంలో శనివారం సాయంత్రం 6.15గంటలకు కర్మజ్‌హిరి రేంజ్‌లో ఈ ఆడ పులి మృతిచెందినట్టు అధికారులు తెలిపారు. ఈ పులికి అటవీశాఖ అధికారులు అంత్యక్రియలు నిర్వహించగా స్థానికులు కూడా అక్కడికి వచ్చి నివాళులర్పించారు.