Imran Khan: పాక్‌ ప్రధానికి పదవీగండం.. సొంత పార్టీలోనే తిరుగుబాటు..!

అవిశ్వాస తీర్మానం నేపథ్యంలో ఇమ్రాన్‌కు పెరుగుతోన్న వ్యతిరేకత

కరాచీ: మరికొన్ని రోజుల్లోనే అవిశ్వాస తీర్మానాన్ని ఎదుర్కోనున్న పాకిస్థాన్‌ ప్రధానమంత్రి ఇమ్రాన్‌ ఖాన్‌కు సొంత పార్టీలోనే తిరుగుబాటు మొదలయ్యింది. ఇప్పటికే ఆయన ప్రభుత్వంలో భాగస్వామ్య పక్షాలు మద్దతు ఉపసంహరించుకుంటాయని వెల్లడించగా.. తాజాగా ఆయన పార్టీకి చెందిన అసంతృప్తి నేతలు ప్రధానికి వ్యతిరేకంగా ఓటు వేసేందుకు సిద్ధమయ్యారు. దాదాపు 24 మంది పీటీఐ పార్టీ నేతలు వ్యతిరేక గళం విప్పడంతో ప్రధానమంత్రి పీఠాన్ని కాపాడుకోవడం ఇమ్రాన్‌ ఖాన్‌కు ఇబ్బందికరమేనని స్పష్టమవుతోంది.

దేశంలో నెలకొన్న సంక్షోభానికి ప్రధానమంత్రి ఇమ్రాన్‌ ఖాన్‌ విధానాలే కారణమని ఆరోపిస్తూ పాకిస్థాన్‌లోని ప్రతిపక్ష పార్టీలు ఆయనపై అవిశ్వాస తీర్మానం ప్రవేశపెట్టాయి. అనంతరం ఆయన భాగస్వామ్య పక్షాలు కూడా విపక్షాల గళాన్ని అందుకున్నాయి. ప్రభుత్వం నుంచి మద్దతు ఉపసంహరించుకుంటామని ప్రకటించాయి. తాజాగా అధికార పాకిస్థాన్‌ తెహ్రీక్‌ ఏ ఇన్సాఫ్‌ (పీటీఐ) పార్టీకి చెందిన 24 మంది చట్టసభ సభ్యులు ఇమ్రాన్‌ ఖాన్‌ ప్రభుత్వాన్ని పడగొట్టే ప్రయత్నాలకు సిద్ధమయ్యారు. ఈ విషయాన్ని పీటీఐకి చెందిన చట్టసభ సభ్యుడు రాజీ రియాజ్‌, మరో సభ్యుడు నూర్‌ ఆలం ఖాన్‌లు పలు వార్తా ఛానెల్‌లకు ఇచ్చిన ఇంటర్వ్యూలలో వెల్లడించారు. ‘ప్రభుత్వ విధానాలపై దాదాపు 24 మంది సభ్యులము తీవ్ర అసంతృప్తితో ఉన్నాం. స్థానిక సమస్యలను లేవనెత్తినప్పటికీ ప్రభుత్వం నుంచి ఎటువంటి స్పందన లేదు’ అంటూ పీటీఐ నేతలు ఆవేదన వ్యక్తం చేశారు.

ఇదిలాఉంటే, ప్రతిపక్షాలు ప్రవేశపెట్టిన అవిశ్వాస తీర్మానంపై మార్చి చివరి తేదీల్లో ఓటింగ్‌ జరిగే అవకాశం కనిపిస్తోంది. ఇదే సమయంలో ప్రభుత్వంపై తిరుగుబాటు చేస్తోన్న నేతలందరూ పాకిస్థాన్‌ పీపుల్స్‌ పార్టీ (పీపీపీ) అధికారంలో ఉన్న సింధ్‌ ప్రభుత్వ సహాయాన్ని కోరుతున్నారు. ఓటింగ్‌ జరిగే వరకు తమకు రక్షణ కల్పించాలని విజ్ఞప్తి చేస్తున్నారు. అయితే, వీటిపై స్పందించిన ఇమ్రాన్‌ ప్రభుత్వం.. పీటీఐ సభ్యులను మభ్యపెట్టి సింధ్‌ ప్రభుత్వం అపహరించుకుపోతోందని ఆరోపిస్తోంది. ఇలా విపక్ష, సొంతపార్టీ నేతల నుంచి తీవ్ర వ్యతిరేకత వ్యక్తమవుతోన్న తరుణంలో అధికారాన్ని నిలబెట్టుకోవడం, వ్యతిరేకంగా ఓటువేసే వారిపై చర్యలకు న్యాయపరంగా ఉన్న మార్గాలపై ఇమ్రాన్‌ ఖాన్‌ దృష్టి సారించినట్లు తెలుస్తోంది.