న్యాయాన్ని గెలిపిస్తానంటున్న సత్యదేవ్‌

ఆసక్తికరంగా ‘తిమ్మరుసు’ సినిమా టీజర్‌

హైదరాబాద్‌: సినిమాసినిమాకూ వైవిధ్యం చూపిస్తూ ప్రేక్షకులను అలరిస్తున్న నటుడు సత్యదేవ్‌. ఈసారి మరింత కొత్తగా మన ముందుకు వస్తున్నాడు. శరణ్‌ కొప్పిశెట్టి దర్శకత్వం వహిస్తున్న ‘తిమ్మరుసు’లో సత్యదేవ్‌ లాయర్‌ అవతారమెత్తాడు. ‘అసైన్‌మెంట్‌ వాలి’ ట్యాగ్‌లైన్‌తో వస్తున్న ఈ సినిమాలో సత్యదేవ్‌కు జోడీగా టాక్సీవాలా హీరోయిన్‌ ప్రియాంక జవాల్కర్‌ నటిస్తోంది. ఈ చిత్రాన్ని ఈస్ట్‌కోస్ట్‌ ప్రొడక్షన్స్ బ్యానర్‌పై మహేశ్‌ కోనేరు‌తో పాటు ఎస్‌ఒరిజినల్స్‌ బ్యానర్‌పై శృజన్ ఎరబోలు సంయుక్తంగా నిర్మిస్తున్నారు. ఈ సినిమా టీజర్‌ను ప్రముఖ డైరెక్టర్‌ పూరీ జగన్నాథ్‌ చేతుల మీదుగా బుధవారం విడుదల చేశారు. ‘కేసు గెలిచామా.. ఓడామా అన్నది కాదు ఇంపార్టెంట్‌.. ఎంత సంపాదించామన్నదే ఇంపార్టెంట్‌’ అని హీరో సత్యదేవ్‌ను ఉద్దేశిస్తూ ఓ వ్యక్తి అంటాడు. దానికి బదులుగా.. ‘నాకు మాత్రం న్యాయం గెలవడమే ఇంపార్టెంట్‌’ అంటూ హీరో చెప్పే డైలాగ్‌తో సాగే ఈ టీజర్‌ ఆసక్తి రేపుతోంది.

ఈ సినిమాలో మధ్యతరగతికి చెందిన నిబద్ధత గల డ్యాషింగ్‌ లాయర్‌ పాత్రలో సత్యదేవ్‌ కనిపించనున్నట్లు తెలుస్తోంది. అతను న్యాయాన్ని గెలిపించేందుకు ఎక్కడి వరకైనా వెళ్లే తత్వం ఉన్న లాయర్‌ అని టీజర్‌ చూస్తే అర్థమవుతోంది. ఇంతకీ న్యాయాన్ని గెలిపించడానికి ఆ లాయర్‌ ఏం చేశాడు..? ఆ క్రమంలో అతనికి ఎలాంటి అడ్డంకులు ఎదురయ్యాయి..? చివరికీ హీరో విజయం సాధించాడా లేదా..? అనేది తెలుసుకోవాలంటే సినిమా చూడాల్సిందే మరి.! వచ్చే నెలలో ఈ సినిమా ప్రేక్షకులను అలరించనున్నట్లు చిత్రంబృందం తెలిపింది.

ఇదీ చదవండి..

ట్విటర్‌లో మోత మోగించిన ఐదు సినిమాలు..