KGF-3: ఫ్యాన్స్‌కు ఊహించని సర్‌ప్రైజ్‌.. కేజీయఫ్-3 ఉండనుందా?

ఇంటర్నెట్‌ డెస్క్: ప్రస్తుతం ఎక్కడ చూసినా ‘కేజీయఫ్-2’ మేనియా కొనసాగుతోంది. భారీ అంచనాలతో ఏప్రిల్‌ 14న విడుదలైన ఈ సినిమాకు ప్రేక్షకుల నుంచి విశేషస్పందన లభిస్తోంది. ఇతర సినిమాలతో పోటీ లేకపోవడం, బ్లాక్‌ బస్టర్‌ టాక్‌ను సొంతం చేసుకోవడంతో యశ్‌ అభిమానులు పండగ చేసుకుంటున్నారు. అయితే సినిమా చూసిన వారందరి నోటా ఇప్పుడు ఒకటే మాట. అదే ‘కేజీయఫ్-2’ సినిమా క్లైమాక్స్‌లో ప్రేక్షకులకు ఊహించని సర్‌ప్రైజ్‌ ఇచ్చాడు దర్శకుడు ప్రశాంత్‌ నీల్‌.

ఎండ్‌ టైటిల్స్‌ పడే దగ్గర ఓ సన్నివేశంలో రవీనా టాండన్‌ ఆశ్చర్యంగా చూస్తూ ఓ పుస్తకాన్ని చేతిలోకి తీసుకుంటుంది. దానిపై ‘కేజీయఫ్-3’ అని రాసి ఉంటుంది. ఆమె ముఖంలో గాంభీర్యం, పవర్‌ఫుల్‌ బ్యాక్‌ గ్రౌండ్‌ స్కోర్‌ దీనికి మరింత హైప్‌నిచ్చాయి. థియేటర్లలో ఈ సీన్‌కు విజిల్స్‌ పడుతున్నాయి. మూడో పార్ట్‌కు ఇది సంకేతమంటూ సామాజిక మాధ్యమాల్లో జోరుగా చర్చ నడుస్తోంది.‘కేజీయఫ్-3’ కావాలంటూ ఫ్యాన్స్‌ ట్విటర్‌లో ట్రెండ్‌ చేస్తున్నారు. దర్శక నిర్మాతలు మాత్రం ఈ విషయంపై అధికారికంగా ఎలాంటి ప్రకటన చేయలేదు. గతంలో ప్రమోషన్లలో భాగంగా ప్రశాంత్‌ నీల్‌ చేసిన వ్యాఖ్యలను నెటిజన్లు గుర్తుచేస్తున్నారు. ‘‘మొదటి భాగంలానే రెండో భాగాన్నీ ప్రేక్షకులు ఆదరిస్తే పార్ట్‌-3 గురించి ఆలోచిస్తా’’ అంటూ ఈ దర్శకుడు స్పందించాడు. ఒకవేళ పార్ట్‌ 3 ఉన్నా అది ఇప్పుడప్పుడే సాధ్యపడే అవకాశం లేదు. అందుకు కారణం ప్రశాంత్‌ నీల్‌కు ఏర్పడిన క్రేజే. పాన్‌ ఇండియా స్థాయిలో ఈ సినిమా విజయం తరవాత ఈ డైనమిక్‌ డైరెక్టర్‌ వరుస అవకాశాలతో బిజీ అయ్యాడు. అందులో ప్రభాస్‌ ‘సలార్‌’ ఒకటి. అనంతరం మరో బడా హీరోతో సినిమా ప్లాన్‌ చేస్తున్నాడనే టాక్‌ నడుస్తోంది.