Bhagavanth kesari: ఆ దమ్ము - ధైర్యం... నాన్న నుంచి వచ్చిన వారసత్వం

 భగవంత్‌ కేసరి వేడుకలో బాలకృష్ణ

‘‘తెలుగు ప్రేక్షకులకు ప్రత్యేకమైన అభిలాష, అభిరుచి ఉంటుంది. ఎప్పుడూ కొత్తదనాన్ని కోరుకుంటారు. వాళ్లు అడిగేవరకు ఆగకుండా మనమే ముందడుగు వేస్తే ఆ ఫలితం ఈ సినిమాలా ఉంటుంది’’ అన్నారు నందమూరి బాలకృష్ణ. ఆయన కథానాయకుడిగా నటించిన ‘భగవంత్‌ కేసరి’ విజయోత్సవం గురువారం రాత్రి హైదరాబాద్‌లో జరిగింది. అనిల్‌ రావిపూడి దర్శకత్వం వహించిన చిత్రమిది. కాజల్‌ కథానాయిక. శ్రీలీల ముఖ్యభూమిక పోషించింది. సాహు గారపాటి, హరీశ్‌ పెద్ది సంయుక్తంగా నిర్మించారు. విజయోత్సవానికి ముఖ్య అతిథులుగా కె.రాఘవేంద్రరావు, అంబికా కృష్ణ హాజరయ్యారు. సక్సెస్‌ టికెట్‌ని ఆవిష్కరించిన బాలకృష్ణ వేడుకని ఉద్దేశించి మాట్లాడారు. ‘‘ఒక మంచి సినిమాని ఇచ్చినప్పుడు ప్రేక్షకులు నీరాజనాలు పలికారంటే అంతకుమించిన సంపాదన, సంతోషం మరేదీ లేదు. వైవిధ్యమైన పాత్రల్ని చేసే దమ్ము, ధైర్యం, నమ్మకం మా నాన్న నుంచి వచ్చిన వారసత్వం. నావరకూ మూడు తరాలుగా ప్రేక్షకుల ప్రశంసలు పొందుతున్నానంటే నా పూర్వజన్మ సుకృతం. పాత్రల కోసం నటీనటులు ఎంతో కష్టపడ్డారు. సాంకేతిక నిపుణులు కూడా అంతే శ్రమించారు. నా సినిమాలకి నా సినిమాలే పోటీ. చేసే విభిన్నమైన పాత్రలు, నిర్మాతలకి నాపైన ఉన్న నమ్మకం, దర్శకులు నన్ను మలిచే కోణం, రచయితలు నాతో పలికించే మాటలు, వీటన్నిటి ఫలితమే ఈ విజయ పరంపర. మాలో చాలా మందికి ఈ సినిమా ప్రత్యేకం. ‘అఖండ,’ ‘వీరసింహారెడ్డి’, ‘భగవంత్‌ కేసరి’... ఇవన్నీ నాకు సవాల్‌ విసిరిన సినిమాలే. అందరి కృషి ఫలితమే ఈ సినిమా విజయం. బాలకృష్ణ సినిమా అంటే వేరు. షడ్రుచులు ఉండాలి, అలాంటి సినిమాని అనిల్‌ రావిపూడి ఇచ్చారు. ఒక మంచి సందేశం ఇస్తున్నాం అన్నప్పుడు దేనికైనా సిద్ధపడాలి. అందుకే నేను చిచ్చాగా నటించా. అలాంటప్పుడే  మనం చెప్పింది ప్రజల్లోకి బలంగా వెళుతుంది. సినిమాకి మించిన బలమైన మాధ్యమం మరొకటి లేదు. అందుకే నా బాధ్యతగా స్వీకరించి కథ చెప్పిన వెంటనే చేద్దామని అంగీకారం తెలిపా. నిర్మాతలు మంచి సినిమా చేయాలనే పరిశ్రమలోకి వచ్చారు. హిందీలో కూడా ఈ సినిమా డబ్‌ అవుతోంది. తొలిసారి హిందీలో  డబ్బింగ్‌ చెప్పాను.  ప్రయోగం చేయడం నాన్న గారి నుంచే నాకు అలవాటు. తెలుగువాళ్ల సత్తా ఈ సినిమా నిరూపిస్తుంది’’ అన్నారు. 

• కె.రాఘవేంద్రరావు మాట్లాడుతూ ‘‘ఇందులో బాలకృష్ణని చూసినప్పుడు నాకు ఎన్టీఆర్‌ గుర్తొచ్చారు. విజ్జి పాప తన గురించి మాట్లాడే సన్నివేశంలో చాలా బాగా చేశాడు. బాలయ్య విజయపతాకం ఎగురుతూనే ఉండాలి. డ్యాన్స్‌ అయినా, ఫైట్‌ అయినా, సెంటిమెంట్‌ సన్నివేశాలైనా  శ్రీలీల  అవలీలగా చేస్తుంది. అనిల్‌ అన్ని రకాల సినిమాలూ చేస్తున్నాడ’ని అభినందించారు’’.
• తమన్‌ మాట్లాడుతూ ‘‘అఖండ’, ‘వీరసింహారెడ్డి’, ‘భగవంత్‌ కేసరి’... బాలకృష్ణతో హ్యాట్రిక్‌ కొట్టానన్న ఆనందంలో ఉన్నా’’ అన్నారు. శ్రీలీల మాట్లాడుతూ ‘‘ఇలాంటి పాత్రల్ని చేయగలుగుతాననే నమ్మకాన్ని పెంచిందీ చిత్రం. నా చిచ్చాని మిస్‌ అవుతున్నా’’ అన్నారు. అనిల్‌ రావిపూడి మాట్లాడుతూ ‘‘ఆరేళ్ల నుంచి అరవయ్యేళ్ల వరకు అందరూ కలిసి కుటుంబ సమేతంగా చూస్తున్న సినిమా.  నా కెరీర్‌లో గొప్ప సినిమా అయ్యింది. ప్రపంచకప్‌లో  భారత్‌ జట్టు ఎంత ఫామ్‌లో ఉందో,  బాలయ్యబాబు అంత ఫామ్‌లో ఉన్నారు. ఈ విజయపరంపర ఇలాగే కొనసాగాలి. అవార్డుల గురించి నాకు పెద్దగా తెలియదు.  వాటికి మనసుంటే బాలకృష్ణ, శ్రీలీల దగ్గరికి రావాలి. అంత బాగా నటించార’’న్నారు. ఈ కార్యక్రమంలో చిత్రబృందం పాల్గొంది.