‘అవతార్‌’ తారలతో ద్విభాషా చిత్రం

ఫస్ట్‌లుక్‌

కోడంబాక్కం, న్యూస్‌టుడే: ప్రపంచ సినీ జనాలను మెప్పించిన చిత్రం ‘అవతార్‌’. ఆస్కార్‌తో పాటు పలు అవార్డులను కైవసం చేసుకుంది ఈ సినిమా. ఇందులో నటించిన కొందరు నటులతో ఓ తమిళ చిత్రం తెరకెక్కుతుండటం విశేషం. రీల్‌ కట్‌ ఎంటర్‌టైన్‌మెంట్‌ బ్యానరుపై తెరకెక్కుతున్న ఈ చిత్రంలో అమెరికా, యూకే, బ్రెజిల్, మలేషియాకు చెందిన నటీనటులు ప్రధాన పాత్రలు పోషిస్తున్నారు. ఈ చిత్రం ద్వారా నరేన్‌ దర్శకుడిగా పరిచయం అవుతున్నారు. తమిళం, తెలుగు భాషల్లో ఏకకాలంలో తెరకెక్కించనున్నారు. నటులకు సంబంధించిన వివరాలను సస్పెన్స్‌గా ఉంచారు. జనవరి 26న ఆ వివరాలు ప్రకటించనున్నట్లు చిత్రవర్గాలు పేర్కొన్నాయి. మరోవైపు ఇతర నటీనటుల ఎంపిక పనులు జరుగుతున్నాయి. మరియా జెరాల్డ్‌ సంగీతం సమకూర్చుతున్నారు. ఫిబ్రవరి 19న లడాక్‌లో చిత్రీకరణ ప్రారంభం కానుంది. మన దేశంతోపాటు నేపాల్, వియత్నాం, సింగపూర్‌లలో దాదాపు 70 రోజుల పాటు చిత్రీకరణ జరపనున్నారు. సినీ జనాలకు ఇదో పెద్ద ట్రీట్‌గా ఉంటుందని చిత్రవర్గాలు చెప్పాయి.