Shah Rukh Khan: రాజ్‌కుమార్‌ హిరాణి- షారుఖ్‌ కాంబో.. టైటిల్‌ ఇదే

ఇంటర్నెట్‌ డెస్క్‌: షారుఖ్‌ ఖాన్‌ హీరోగా ప్రముఖ దర్శకుడు రాజ్‌కుమార్‌ హిరాణి ఓ చిత్రం రూపొందిస్తున్నారనే సంగతి తెలిసిందే. ఈ కాంబినేషన్‌పై అధికారిక ప్రకటన తాజాగా విడుదలైంది. రాజ్‌కుమార్‌ హిరాణి, రెడ్‌ చిల్లీస్‌ ఎంటర్‌టైన్‌మెంట్స్‌ సంస్థలు సంయుక్తంగా నిర్మిస్తున్న ఈ చిత్రానికి ‘డంకీ’ (Dunki) అనే పేరు ఖరారైంది. ఈ మేరకు ఓ ఆసక్తికర వీడియోను చిత్ర బృందం పంచుకుంది. ఇందులో.. దర్శకుడి గత చిత్రాల గురించి చెప్తూ కనిపించాడు షారుఖ్‌. ఈ విభిన్న కథా చిత్రంలో షారుఖ్‌కు జోడీగా తాప్సీ సందడి చేయనుంది. ఈ సినిమాని 2023 డిసెంబరు 22న విడుదల చేసేందుకు సన్నాహాలు చేస్తున్నారు.

మరోవైపు, ‘పఠాన్‌’తో బిజీగా ఉన్న ఆయన తమిళ దర్శకుడు అట్లీతో ఓ చిత్రం ఖరారు చేశారు. 2018లో వచ్చిన ‘జీరో’ తర్వాత షారుఖ్‌ మళ్లీ తెరపై కనిపించకపోవడంతో ఆయన కొత్త చిత్రాల కోసం అభిమానులు ఎంతో ఆసక్తిగా ఎదురుచూస్తున్నారు. ‘మున్నాభాయ్‌ ఎంబీబీఎస్‌’, ‘లగే రహో మున్నా భాయ్‌’, ‘3 ఇడియట్స్‌’, ‘పీకే’, ‘సంజు’ వంటి సూపర్‌ హిట్‌ చిత్రాలను తెరకెక్కించిన దర్శకుడే రాజ్‌కుమార్‌ హిరాణి.