భావోద్వేగాల కానిస్టేబుల్‌

ప్రేమ కథా చిత్రాలతో ప్రేక్షకుల్ని అలరించిన వరుణ్‌సందేశ్‌ ఓ కానిస్టేబుల్‌గా నటిస్తున్నారు. ఆయన కథానాయకుడిగా... ఆర్యన్‌ సుభాన్‌.ఎస్‌.కె దర్శకత్వంలో రూపొందుతున్న చిత్రం ‘ది కానిస్టేబుల్‌’. బలగం జగదీశ్‌ నిర్మాత. ఇటీవలే లాంఛనంగా మొదలైన ఈ సినిమా 5 నుంచి సెట్స్‌పైకి వెళ్లనుంది. దర్శకుడు మాట్లాడుతూ ‘‘నేర నేపథ్యంలో సాగే చిత్రమిది. ఉత్కంఠ రేకెత్తించే అంశాలున్నాయి’’ అన్నారు. వరుణ్‌ సందేశ్‌ మాట్లాడుతూ ‘‘భావోద్వేగాల్ని నింపుకున్న ఓ కానిస్టేబుల్‌ పాత్రలో నటిస్తున్నా. ఈ తరహా చిత్రం ఇదివరకెప్పుడూ చేయలేదు. దర్శకుడు తయారు చేసిన కథ, కథనం ఎంతగానో ఆకట్టుకుంది. ఇందులో నటిస్తుండడం ఎంతో ఆనందంగా ఉంది’’ అన్నారు. దువ్వాసి మోహన్‌, సూర్య, కల్పలత తదితరులు నటిస్తున్న ఈ చిత్రానికి ఛాయాగ్రహణం: హజరత్‌ షేక్‌, సంగీతం: సుభాస్‌ ఆనంద్‌.