Teja Sajja: తరాలుగా తప్పని మహారణంతో... మిరాయ్‌

‘హను-మాన్‌’తో సూపర్‌ హీరో అనిపించుకున్న తేజ సజ్జా... సూపర్‌ యోధుడిగా తెరపై సందడి చేయనున్నారు. ఆయన కథానాయకుడిగా పీపుల్‌ మీడియా ఫ్యాక్టరీ పతాకంపై ఓ చిత్రం తెరకెక్కుతోంది. కార్తీక్‌ ఘట్టమనేని దర్శకత్వం వహిస్తున్నారు. టి.జి.విశ్వప్రసాద్‌ నిర్మాత. భవిష్యత్తు అనే అర్థం వచ్చేలా ‘మిరాయ్‌’ అనే పేరుని ఈ సినిమాకి ఖరారు చేశారు. గురువారం ఫస్ట్‌లుక్‌ పోస్టర్‌తోపాటు, వీడియో ప్రచార చిత్రాన్ని విడుదల చేశారు. ‘‘సమ్రాట్‌ అశోక్‌. చరిత్రలో మరకగా మిగిలిన అతని కళింగ యుద్ధం.  ఆ పశ్చాత్తాపంలో వెలుగు చూసిన ఓ దేవ రహస్యం. అదే మనిషిని దైవం చేసే తొమ్మిది గ్రంథాల అపార జ్ఞానం. తరాలుగా వాటిని కాపాడుతూ తొమ్మిది యోధుల నియామకం. అలాంటి జ్ఞానానికి చేరువవుతున్న ఓ గ్రహణం. ఆ గ్రహణాన్ని ఆపే ఓ జననం. ఇది తరాలుగా తప్పని మహారణం’గా కథని పరిచయం చేసింది ప్రచార చిత్రం. తెలుగుతోపాటు, హిందీ, తమిళ, కన్నడ, మలయాళ, బెంగాలీ, మరాఠీ భాషల్లో వచ్చే ఏడాది ఏప్రిల్‌ 18న విడుదల చేస్తున్నట్లు ప్రకటించారు.

ఈ సందర్భంగా దర్శకుడు మాట్లాడుతూ ‘‘మిరాయ్‌ అనేది అశోకుని కాలంలో రహస్యమైన ఓ శాసనం. దీని గురించి సినిమా విడుదల తర్వాత మరింత బాగా అర్థమవుతుంది. ఈ కథ కోసం చాలా నేర్చుకుని సినిమా చేస్తున్నా. ‘హను-మాన్‌’కి ముందే ఈ  కథని తేజకి చెప్పా. పదేళ్లుగా తనతో ప్రయాణం చేస్తున్నా. ఇదొక అద్భుతమైన సినిమాగా మలుస్తున్నా. ఈ చిత్రంలో మంచు మనోజ్‌ ఓ కీలక పాత్రలో నటిస్తారు’’ అన్నారు. తేజ మాట్లాడుతూ ‘‘నన్నొక యోధుడిగా తెరపై చూపిస్తున్నారు కార్తీక్‌. ఆయన విజన్‌ గొప్పగా ఉంటుంది. ఆర్నెళ్ల కిందటే ఈ సినిమాని మొదలుపెట్టాం. వచ్చే ఏడాది విడుదల రోజు గుడ్‌ ఫ్రైడే. నాతోపాటు, అందరికీ అది గుడ్‌ ఫ్రైడే అవుతుంది. ‘హను-మాన్‌’ తర్వాత రిలాక్స్‌ అయిపోయావా అని చాలా మంది అడుగుతున్నారు. కానీ ప్రతి అడుగూ జాగ్రత్తగా వేసే క్రమంలోనే ఈ సినిమా చేస్తున్నా. మాకున్న వనరులతో భారీగా చేస్తున్నాం. టి.జి.విశ్వప్రసాద్‌ నిర్మాణంలో చేయడం చాలా ఆనందంగా ఉంది’’ అన్నారు.

నిర్మాత టి.జి.విశ్వప్రసాద్‌ మాట్లాడుతూ ‘‘కార్తీక్‌తో మా ప్రయాణం చాలా బాగుంది. ఈ సినిమాలోని ప్రతి సన్నివేశం తెరపై కన్నులపండుగలా ఉంటుంది. పాన్‌ వరల్డ్‌ రికార్డుల్ని సృష్టించే చిత్రం అవుతుంది’’ అన్నారు. ప్రముఖ నిర్మాత డి.సురేశ్‌బాబు మాట్లాడుతూ ‘‘కార్తీక్‌, తేజ, విశ్వప్రసాద్‌... ఈ ముగ్గురి కల ఈ సినిమాతో నెరవేరుతుంది. గౌర హరి సంగీతం చాలా బాగుంది. అందరూ కలిసి ఓ అద్భుతమైన సినిమాని అందిస్తున్నారని ప్రచార చిత్రం స్పష్టం చేస్తుంది’’ అన్నారు. ఈ కార్యక్రమంలో సినీ ప్రముఖులు నందినిరెడ్డి, మల్లిక్‌ రామ్‌, కృష్ణచైతన్య, బెక్కం వేణుగోపాల్‌, ఎస్‌.కె.ఎన్‌, శ్రీరామ్‌ ఆదిత్య, సాహు గారపాటి, వివేక్‌ కూచిభొట్ల, కళా దర్శకుడు నాగేంద్ర, సంగీత దర్శకుడు గౌర హరి, ఇతర చిత్రబృందం పాల్గొంది.