HanuMan: ‘హను-మాన్‌’ అంతర్జాతీయ చిత్రం..: ప్రశాంత్ వర్మ

హైదరాబాద్‌: యువ నటుడు తేజ సజ్జ హీరోగా ప్రశాంత్ వర్మ దర్శకత్వంలో తెరకెక్కుతోన్న చిత్రం ‘హను-మాన్‌’. తాజాగా విడుదలైన ఈ సినిమా టీజర్‌కు మంచి ప్రేక్షకాదరణ లభిస్తోంది. రిలీజ్‌ అయినప్పటి నుంచి యూట్యూబ్‌లో ట్రెండింగ్‌లో ఉంటూ అందరినీ ఆకర్షిస్తోంది. అంతర్జాతీయ స్థాయిలో ప్రశంసలు అందుకుంటున్న ఈ టీజర్‌ గురించి చిత్ర దర్శకుడు మాట్లాడిన మాటలు సోషల్‌ మీడియాలో వైరల్‌ అవుతున్నాయి. 
‘‘నాకు చిన్నప్పటి నుంచి హనుమంతుడు చాలా ఇష్టం. ఇంత భారీ బడ్జెట్‌తో ఆయనపై సినిమా తీస్తున్నందుకు ఆనందంగా ఉంది. ఈ సినిమా బడ్జెట్‌ మేము అనుకున్నదాని కంటే 6 రెట్లు ఎక్కువైంది. ఇది తెలుగు సినిమా మాత్రమే కాదు. అంతర్జాతీయ స్థాయి సినిమా. హనుమంతుడు గొప్ప వీరుడు. సూపర్‌మ్యాన్, బ్యాట్‌మ్యాన్‌ కంటే శక్తిమంతుడు. నాకు మొదటి నుంచి పౌరాణిక కథలు వినడం, చదవడం చాలా ఇష్టం. ఈ సినిమాలో అంజనాద్రి అనే ప్రపంచాన్ని సృష్టించాం. అది అద్భుతంగా వచ్చినందుకు చాలా సంతోషంగా ఉంది. దీని కోసం  ఎన్నో వీఎఫ్‌ఎక్స్‌ స్టూడియోలతో కలిసి పనిచేశాం. ఈ సినిమాను ఇతరభాషల్లో కూడా విడుదల చేసేందుకు ప్రయత్నిస్తున్నాం’’ అని ప్రశాంత్‌వర్మ చెప్పారు. తేజ సజ్జ సరసన అమృతా అయ్యర్‌ నటిస్తున్న ఈ సినిమాను ప్రైమ్‌ షో ఎంటర్‌టైన్‌మెంట్‌ పతాకంపై కె.నిరంజన్‌ రెడ్డి నిర్మిస్తున్నారు.