The First Case: హిందీ ‘హిట్‌’ ట్రైలర్‌ చూశారా?

ఇంటర్నెట్‌ డెస్క్‌: ‘నీకు, లేదా నీ స్నేహితుల్లో ఎవరికైనా బ్లూ సెడాన్‌ కారు ఉందా?’ అంటూ కనిపించిన ప్రతి ఒక్కరినీ ప్రశ్నిస్తున్నారు రాజ్‌ కుమార్‌రావు(Rajkumar Rao). ఆయన పోలీస్‌ ఆఫీసర్‌గా తెరకెక్కిన సస్పెన్స్‌ థ్రిల్లర్‌ ‘హిట్‌: ది ఫస్ట్‌ కేస్‌’(HIT: The first case). సాన్య మల్హోత్ర కథానాయిక. శైలేష్‌ కొలను దర్శకుడు. 2020లో విశ్వక్‌సేన్‌ కీలక పాత్రలో నటించిన ‘హిట్‌’కు రీమేక్‌గా ఈ మూవీ తెరకెక్కింది. మాతృక మాదిరిగానే కథ, కథానాలను తీర్చిదిద్దినట్లు ట్రైలర్‌ చూస్తే అర్థమవుతోంది. రాజ్‌కుమార్‌రావు నటన, ఉత్కంఠ కలిగించే సన్నివేశాలు సినిమాకు ప్రధాన ఆకర్షణగా నిలవనున్నాయి. అన్ని కార్యక్రమాలు పూర్తి చేసుకున్న ఈ సినిమా జులై 15న ప్రేక్షకుల ముందుకు రానుంది. అప్పటివరకూ ఈ ట్రైలర్‌ చూసేయండి. మరోవైపు శైలేష్‌ కొలను దర్శకత్వంలో అడవి శేష్‌ హీరోగా ‘హిట్‌-2’ తెరకెక్కిన సంగతి తెలిసిందే. ఇది కూడా వచ్చే నెలలోనే ప్రేక్షకుల ముందుకు తీసుకొచ్చేందుకు సన్నాహాలు చేస్తున్నారు.

కథ ఇదీ: ప్రమాదాల్ని ముందే ఊహించి అరిక‌ట్టే హోమిసైడ్‌ ఇంటర్వెన్షన్‌ టీమ్‌ (హిట్‌)కి చెందిన ఓ పోలీస్ అధికారిగా పనిచేస్తుంటాడు రాజ్‌ కుమార్‌రావు. మాన‌సికంగా తను ఒక స‌మ‌స్యతో బాధ‌ప‌డుతుంటాడు. దాంతో అత‌న్ని గ‌తం వెంటాడుతుంటుంది. కొన్నిరోజులు ఉద్యోగానికి సెల‌వు పెట్టి విశ్రాంతి తీసుకోవాల‌నుకుంటాడు. ఇంత‌లోనే ప్రీతి అనే అమ్మాయి కిడ్నాప్ అవుతుంది. ఆ వెంటనే ఫోరెన్సిక్ డిపార్ట్‌మెంట్‌లో ప‌నిచేస్తున్న త‌న ప్రేయ‌సి డాక్టర్ నేహా (సాన్య మల్హోత్ర) కూడా అదృశ్యమవుతుంది. అప్పుడు విక్రమ్ ఈ రెండు కేసుల్ని ఎలా ఛేదించాడు?ఆయ‌న్ని వెంటాడుతున్న గ‌తం వెన‌క క‌థేమిటి? త‌దిత‌ర విష‌యాలు తెలియాలంటే సినిమా చూడాల్సిందే.