Manjummel Boys: తెలుగులోకి ‘మంజుమ్మల్‌ బాయ్స్‌’

ఇటీవల మలయాళ చిత్రసీమలో సంచలన విజయాన్ని అందుకున్న చిత్రాల్లో ‘మంజుమ్మల్‌ బాయ్స్‌’ ఒకటి. చిదంబరం ఎస్‌ పొదువల్‌ తెరకెక్కించిన ఈ సినిమాని ఇప్పుడదే పేరుతో తెలుగు ప్రేక్షకుల ముందుకు తీసుకొస్తోంది ప్రముఖ నిర్మాణ సంస్థ మైత్రీ మూవీ మేకర్స్‌. దీన్ని ఏప్రిల్‌ 6న విడుదల చేస్తున్నట్లు మంగళవారం అధికారికంగా ప్రకటించారు. ‘‘2006లో కొడైకెనాల్‌లోని గుణకేవ్‌లో చిక్కుకున్న తమ స్నేహితుణ్ని రక్షించిన ఎర్నాకులం మంజుమ్మల్‌ యువకుల నిజమైన అనుభవం ఆధారంగా ఈ చిత్రం రూపొందింది. ఇది రూ.200కోట్ల వసూళ్లు సాధించిన తొలి మలయాళ చిత్రంగా చరిత్ర సృష్టించింది. తెలుగులోనూ అలాంటి విజయాన్నే అందుకుంటుందని ఆశిస్తున్నాం’’ అని చిత్ర నిర్మాతలు తెలిపారు. ఈ సినిమాలో సౌబిన్‌ షాహిర్‌, గణపతి, ఖలీద్‌ రెహమాన్‌, శ్రీనాథ్‌ భాసి తదితరులు ప్రధాన పాత్రలు పోషించారు. సుశీన్‌ శ్యామ్‌ సంగీతమందించగా.. షైజు ఖలీద్‌ ఛాయాగ్రాహకుడిగా వ్యవహరించారు.