NTR31: భిన్నమైన భావోద్వేగాలతో ఎన్టీఆర్‌ 31

కథానాయకుడు ఎన్టీఆర్‌ నటించనున్న 31వ సినిమా ఇప్పటికే ఖరారైంది. దీనికి ప్రశాంత్‌ నీల్‌ దర్శకత్వం వహించనుండగా.. మైత్రీ మూవీ మేకర్స్‌, ఎన్టీఆర్‌ ఆర్ట్స్‌ సంస్థలు సంయుక్తంగా నిర్మించనున్నాయి. ఇది వచ్చే ఏడాది ద్వితీయార్ధంలో పట్టాలెక్కనుంది. ఈ విషయాన్ని ప్రశాంత్‌ నీల్‌ ధ్రువీకరిస్తూ.. చిత్ర కథాంశంపైనా తాజాగా ఓ ఇంటర్వ్యూలో స్పష్టత ఇచ్చారు. ‘‘దీన్ని అందరూ ఓ యాక్షన్‌ సినిమాలా భావిస్తారని నాకు తెలుసు. కానీ, నేను నా జానర్‌లోకి వెళ్లాలనుకోవట్లేదు. నిజానికిది భిన్నమైన భావోద్వేగాలతో కూడిన వైవిధ్యభరిత చిత్రంగా ఉంటుంది. ఇది నాకు చాలా కొత్త కథ అని చెప్పగలను’’ అని ప్రశాంత్‌ వెల్లడించారు. ఈ సందర్భంగా ఆయన ‘కేజీఎఫ్‌ 3’ చిత్రం గురించి కొన్ని ఆసక్తికర విషయాలు పంచుకున్నారు. ఈ సినిమా స్క్రిప్ట్‌ ఇప్పటికే సిద్ధమైందని.. కాకపోతే అది తన దర్శకత్వంలో ఉంటుందా? లేదా? అన్నది స్పష్టత లేదని చెప్పారు. ప్రస్తుతం ప్రశాంత్‌ నీల్‌ దర్శకత్వంలో ప్రభాస్‌ హీరోగా నటించిన ‘సలార్‌’ చిత్రం విడుదలకు సిద్ధంగా ఉంది. ఈ చిత్ర తొలి భాగం ‘సలార్‌ పార్ట్‌ 1: ది సీజ్‌ ఫైర్‌’ పేరుతో ఈ నెల 22న థియేటర్లలోకి రానుంది.