Kantara: ఆ మాట ఎన్టీఆర్‌కు సరిగ్గా సరిపోతుంది.. : కాంతార హీరో రిషబ్‌ శెట్టి

హైదరాబాద్‌: రిషబ్‌శెట్టి.. కొన్నిరోజులుగా ఇండస్ట్రీలో అందరి నోట వినిపిస్తోన్న పేరు. కాంతర సినిమా దర్శకుడిగా, హీరోగా తనేంటో నిరూపించుకొని అందరి ప్రశంసలు పొందుతున్నాడు. చిన్న సినిమాగా విడుదలైన ఈ చిత్రం ఎన్నో రికార్డులు కొల్లగొట్టి నిర్మాతలకు కాసుల వర్షం కురిపించింది. తాజాగా రిషబ్‌శెట్టి ఓ ఆంగ్ల మీడియాతో మాట్లాడుతూ పలువురు హీరోల గురించి ఆసక్తికర వ్యాఖ్యలు చేశారు.

‘‘కమల్‌ హాసన్‌.. ఆయన నటనలో దేవుడితో సమానం. ఇక అమితాబ్‌ బచ్చన్‌కు నేను వీరాభిమానిని. బిగ్‌బీ నటించిన ప్రతి సినిమాను చూస్తాను. కాంతార సినిమాలోని శివ పాత్రకు అమితాబ్‌ ‘యాంగ్రీ యంగ్‌ మ్యాన్‌’ సినిమాలోని పాత్రకు దగ్గర పోలికలు ఉంటాయి. ఈ సినిమాలోని అమితాబ్‌ పాత్ర నన్ను ఎంతగానో ప్రభావితం చేసింది’’ అన్నాడు. ఇక టాలీవుడ్‌ హీరో జూనియర్‌ ఎన్టీఆర్‌, కేజీయఫ్‌ స్టార్‌ యశ్‌ గురించి మాట్లాడుతూ..‘‘ఎన్టీఆర్‌ ఎలాంటి పాత్రలో అయినా ఒదిగిపోతారు. అద్భుతంగా నటిస్తాడు. ‘ఎనర్జిటిక్‌ పెర్ఫార్మర్‌’ అనే మాట తనకు సరిగ్గా సరిపోతుంది. యశ్ ఎలాంటి సినిమా నేపథ్యం లేకుండా సినీరంగ ప్రవేశం చేసి మంచి విజయాలను అందుకుంటున్నాడు. ఈ విషయంలో యశ్‌ చాలా మందికి స్ఫూర్తి’’ అంటూ ప్రశంసించాడు.