Butta Bomma: ‘బుట్టబొమ్మ’ అరుదైన రికార్డు

ఇంటర్నెట్‌ డెస్క్‌: చిన్నాపెద్దా, క్లాస్‌-మాస్‌ అనే తేడా లేకుండా అందరినీ అలరించిన ‘బుట్టబొమ్మ’ పాట అరుదైన రికార్డు సాధించింది. టాలీవుడ్‌కు సంబంధించి అత్యధిక వీక్షణలు, లైక్స్‌ సొంతం చేసుకున్న వీడియో సాంగ్‌గా నిలిచింది. 700 మిలియన్‌ (70 కోట్లు)కిపైగా వ్యూస్‌, 4 మిలియన్‌ (40 లక్షలు)కిపైగా లైక్స్‌తో యూట్యూబ్‌లో సంచలనం సృష్టించింది. 2020 ఫిబ్రవరి 25న విడుదలైన ఈ వీడియోను ఆదరించిన వారందరికీ చిత్ర బృందం ధన్యవాదాలు తెలిపింది. అల్లు అర్జున్‌, పూజా హెగ్డే జంటగా తెరకెక్కిన ‘అల వైకుంఠపురములో’ సినిమాలోని గీతమిది. త్రివిక్రమ్‌ శ్రీనివాస్‌ దర్శకత్వం వహించారు. రామజోగయ్య శాస్త్రి సాహిత్యం అందించిన ఈ పాటకు తమన్‌ స్వరాలు సమకూర్చారు. అర్మాన్‌ మాలిక్‌ ఆలపించారు. అద్భుతమైన సంగీతం, సాహిత్యం, గానంతోపాటు పూజా అందం, అల్లు అర్జున్‌ నృత్యం.. అన్నీ ఈ వీడియో విజయానికి కారణమయ్యాయి.