Thandel: ఇక రాజులమ్మ జాతరే

‘గుర్తెట్టుకో.. ఈపాలి యాట గురి తప్పేదేలేదేస్‌...’ అంటున్నారు నాగచైతన్య. ఇదంతా ‘తండేల్‌’ కోసమే! నాగచైతన్య కథానాయకుడిగా... చందూ మొండేటి దర్శకత్వంలో తెరకెక్కుతున్న చిత్రమిది. సాయిపల్లవి కథానాయిక. గీతా ఆర్ట్స్‌ పతాకంపై బన్నీ వాస్‌ నిర్మిస్తున్నారు. అల్లు అరవింద్‌ సమర్పకులు. ఈ సినిమా కథా ప్రపంచాన్ని ఓ వీడియోతో శనివారం ఆవిష్కరించింది చిత్రబృందం. ‘ఇక రాజులమ్మ జాతరే..., బుగ్గిలేపి దుల్లకొట్టేస్తా...’ అంటూ నాగచైతన్య ఉత్తరాంధ్ర యాసలో చేసిన సందడి ప్రధాన ఆకర్షణగా నిలిచింది. ఒక జాలరి ప్రేమకథకి.. దేశభక్తి అంశాల్నీ జోడించి ఈ చిత్రాన్ని తెరకెక్కిస్తున్నారు. పాకిస్థాన్‌లో బందీ అయిన జాలరిగా నాగచైతన్య కనిపిస్తారు. కథానాయకుడు బుజ్జితల్లి అని పిలుచుకునే అతని ప్రియురాలిగా సాయిపల్లవి కనిపించనుంది. ఈ చిత్రానికి ఛాయాగ్రహణం: శ్యామ్‌దత్‌, సంగీతం: దేవిశ్రీప్రసాద్‌, కూర్పు: నవీన్‌ నూలి.